बस चालकासह ४ विद्यार्थी जखमी
marathinews24.com
पुणे– विद्यार्थ्यांना शाळेतून घरी घेऊन निघालेल्या स्कूल व्हॅनचा अपघात झाल्याची घटना काळेपडळ परिसरात घडली. चालकाचे नियत्रंण सुटल्याने स्कूल व्हॅन लाईटच्या पोलला जाऊन धडकली. अपघातात बस चालकासह चार विद्यार्थी जखमी झाल्याची माहिती पोलिसांनी दिली. गुरूवारी दुपारी दीडच्या सुमारास अपघात झाला. याप्रकरणी काळेपडळ पोलीस ठाण्यात चालक अमोल विनायक बोराटे (रा. काळेपडळ) याच्यावर गुन्हा दाखल केला आहे.
पुण्यात अवकाळी पावसाचा तडाखा, ८२ ठिकाणी झाडपड – सविस्तर बातमी
पोलिसांच्या माहितीनुसार, साधना विद्यालयाची खासगी विद्यार्थी बस विद्यार्थ्यांना घेऊन जात होती. बसचालक अमोल हा विद्यार्थ्यांना घरी सोडण्यास जात होता. व्हॅनमध्ये ३० ते ३५ विद्यार्थी होते. सर्व विद्यार्थी आठवी ते दहावीमधील होते. व्हॅन म्हसोबा चौकात आल्यानंतर अचानक चालकाचे नियत्रंण सुटून बस लाईटच्या पोलला धडकली. त्यात बसचा पुढील भाग तुटला गेला. बसचा स्पीड मोठा असल्याने चालक अमोल याच्यासह तीन ते चार विद्यार्थी जखमी झाले.
नागरिकांनी तत्काळ पोलिसांना माहिती देत जखमी विद्यार्थ्यांना रुग्णालयात दाखल केले. एका विद्यार्थ्याला फॅक्चर झाल्याचे माहिती असल्याचे पोलिसांनी सांगितले. तर चालकही जखमी झाला आहे. दरम्यान, अपघाताची माहिती मिळताच पोलिसांनी क्रेनच्या मदतीने स्कूल व्हॅन बाजूलाकरून वाहतूक सुरळीत केली.
