खाकी गणवेशात रुग्णालयात प्रवेश
marathinews24.com
पुणे – खाकी गणवेश परिधान करुन पोलीस उपनिरीक्षक असल्याची बतावणी करणाऱ्या महिलेला लष्कर पोलिसांनी अटक केली. लष्कर भागातील एका रुग्णालयात वैद्यकीय तज्ज्ञांची भेट लवकर मिळावी म्हणून तिने खाकी गणवेश परिधान करुन बतावणी केल्याचे उघडकीस आले आहे.
एमएनजीएल मीटर अपडेटच्या बहाण्याने जेष्ठाची साडेतीन लाखांची फसवणूक – सविस्तर बातमी
या प्रकणी समिना आफिस इनामदार उर्फ समिना आयुब पठाण (वय २५, रा. म्हाळुंगे) हिच्याविरुद्ध गुन्हा दाखल करण्यात आला. इनामदार हिला पोलिसांनी अटक केली. याबाबत सहायक पोलीस फौजदार महेश शिंदे यांनी लष्कर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शनिवारी (६ जून) सकाळी दहाच्या सुमारास आरोपी महिला व्हिक्टरी चित्रपटगृहासमोरील एका खासगी रुग्णालयात आली होती. त्या वेळी रुग्णालयात सहायक फौजदार शिंदे हे तपासणीसाठी गेले होते. शिंदे यांना पाहिल्यानंतर इनामदाराने त्यांच्याकडे कोणत्या पोलीस ठाण्यात नियुक्तीस आहात अशी विचारणा केली. वैद्यकीय तज्ज्ञांचा भेट घेण्यासाठी मी आली असून, माझा क्रमांक लावा, असे तिने त्यांना सांगितले. शिंदे यांनी इनामदारने परिधान केलेल्या गणवेशावरील ‘नेमप्लेट’ (संपूर्ण नाव) पाहिली. तेव्हा तिने ‘नेमप्लेट’ गणवेशावर चुकीच्या पद्धतीने लावली होती. उजव्या बाजूला नेमप्लेट न लावात गणवेशावरील डाव्या बाजूस लावली होती. शिंदे यांना संशय आला. त्यांनी तिच्याकडे विचारणा केली.
तेव्हा तिने बाणेर पोलीस ठाण्यात नियुक्तीस असून, रात्रपाळीवरुन थेट रुग्णालयात आल्याचे त्यांना सांगितले. संशय आल्याने शिंदे यांनी लष्कर पोलीस ठाण्यातील महिला पोलीस कर्मचाऱ्यांना याबाबतची माहिती दिली. महिला पोलिसंनी इनामदार हिची चौकशी केली. तेव्हा आरोपीने पोलीस असल्याची बतावणी केल्याचे उघड झाले. पोलीस उपनिरीक्षक यादव तपास करत आहेत.
