पोलिसांनी केले अटक, ४ गुन्हे उघडकीस
marathinews24.com
पुणे – घरफोडीसह वाहन चोरी करणार्या सराईताला कोंढवा बुद्रूक येवलेवाडी पोलिसांनी तब्बल २ किलोमीटरचा पाठलाग करून अटक केली आहे. त्याच्याकडून घरफोडीचे दोन आणि वाहन चोरी, शरीराविरूद्धचा मिळून चार गुन्हे उघडकीस आले आहेत. गुन्ह्यातील २ लाख ९० हजारांचा ऐवज पोलिसांनी जप्त केला आहे. मह्या उर्फ महेश काशिनाथ चव्हाण (वय २१ रा. गाडीतळ, हडपसर) असे अटक केलेल्याचे नाव आहे.
पुण्यातील अनेकांची बँकखाती पोलिसांच्या रडारवर – सविस्तर बातमी
कोंढव्यातील टिळेकरनगरात तिघाजणांनी घरफोडी करीत ४ लाख ७० हजारांचा ऐवज चोरून नेला होता. याप्रकरणी पोलिसांनी तपास केला असता, संबंधित गुन्हा सराईत महेश चव्हाण याने केल्याचे स्पष्ट झाले. तो १७ जुलैला गोकुळनगरात कोणालातरी भेटण्यासाठी येणार असल्याची माहिती अमलदार अभिजीत जाधव, विजय खेंगरे यांना मिळाली. त्यानुसार पोलिसांनी सापळा रचून त्याला ताब्यात घेण्याची तयारी केली. आरोपी महेश चव्हाण हा रिक्षातून खाली उतरल्यानंतर पोलिसांनी झडप घालून पकडण्याचा प्रयत्न केला. मात्र, त्याने धक्का देउन पळ काढला.
तो २ किलोमीटर पळाला, बिल्डींगवरही लपला
पोलिसांना धक्का दिल्यानंतर सराईत चव्हाण हा २ किलोमीटर पळत होता. गर्दीतून वाट काढून तो बांधकाम सुरू असलेल्या इमारतीवर जाउन लपून बसला. पोलीस त्याठिकाणी गेले असता, त्याने पुन्हा इमारतीवरून उडी मारून पळून जाण्याचा प्रयत्न केला. मात्र, अखेरीस पोलिसांनी त्याला ताब्यात घेतले. चौकशीत त्याने टिळेकरनगरातील सारंगी हाईटसमध्ये साथीदारांसह चोरी केल्याची कबुली दिली. ही कामगिरी उपायुक्त राजलक्ष्मी शिवणकर, एसीपी रामदास इंगवले, वरिष्ठ पोलीस निरीक्षक मारूती पाटील, पोलीस निरीक्षक दीपक कारंडे, उपनिरीक्षक आकाश विटे, अभिजीत जाधव, अभिजीत रत्नपारखी, गणेश चिंचकर, विजय खेंगरे, अनिल बनकर, किशोर पवार, रूपेश पाटील, लक्ष्मण होळकर, मयूर मोरे, सुजित मदन यांनी केली.
