पेट्रोल पंप सुरू करण्याचे आश्वासन देत व्यावसायिकाला घातला गंडा
marathinews24.com
पुणे – पेट्रोल पंप व्यवसायात भागीदारीच्या आमिषाने एका व्यावसायिकाची दोन कोटी २९ लाख रुपयांची फसवणूक करण्यात आल्याचा प्रकार उघडकीस आला. या प्रकरणी एकाविरुद्ध भारती विद्यापीठ पोलिसांनी गुन्हा दाखल केला. भूषण प्रभाकर वास्ते (वय ३५, रा. करकम, ता. पंढरपूर, जि. सोलापूर) असे गु्न्हा दाखल केलेल्याचे नाव आहे. याबाबत एका व्यावसायिकाने भारती विद्यापीठ पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार हे कात्रज परिसरात राहायला आहेत.
कच्चे तेल व्यवसायात गुंतवणुकीचे आमिष; पावणेतीन कोटींची फसवणूक – सविस्तर बातमी
पोलिसांनी दिलेल्या माहितीनुसार, २०२१ मध्ये आरोपीची तक्रारदार व्यावसायिकाची ओळख झाली होती. आरोपीने व्यावसायिकाला पेट्रोल पंप भागीदारीत सुरू करण्याचे आमिष दाखविले होते. त्यानंतर आरोपीने त्यांच्याकडून दोन कोटी २९ लाख रुपये घेतले. पेट्रोल पंपाच्या नावे सुरू असलेल्या एका बँक खात्यात व्यावसायिकाने वेळोवेळी पैसे जमा केले. आराेपीने पेट्रोल पंप सुरू केला नाही. व्यावसायिकाने पैशांबाबत विचारणा केली. तेव्हा त्याने उडवाउडवीची उत्तरे दिली. फसवणूक झाल्याचे उघडकीस आल्यानंतर त्यांनी पोलिसांकडे तक्रार दिली.
