पुण्यात भरधाव मोटारीच्या धडकेत संगणक अभियंत्याचा मृत्यू

 पाषाण रस्त्यावर घडला अपघात

marathinews24.com

पुणे – भरधाव मोटारीच्या धडकेत सकाळी फिरायला निघालेल्या संगणक अभियंता तरुणाचा मृत्यू झाल्याची घटना शनिवारी सकाळी पाषाण परिसरात घडली. या प्रकरणी मोटार चालक तरुणाविरुद्ध चतु:शृंगी पोलिसांनी गुन्हा दाखल केला. वीरेंद्र राघवेंद्रप्रसाद द्विवेदी (वय ४८, रा. गुलमोहोर प्लाझा, विवेकानंद सोसायटी, पाषाण) असे मृत्युमुखी पडलेल्या संगणक अभियंत्याचे नाव आहे. याप्रकरणी मोटार चालकाविरुद्ध गुन्हा दाखल करण्यात आला. याबाबत वीरेंद्र यांचे बंधू धीरेंद्र (वय ४३) यांनी चतु:शृंगी पोलीस ठाण्यात फिर्याद दिली आहे.

सहकारनगर भागात वाहनांची तोडफोड; आरोपी अटकेत – सविस्तर बातमी 

पोलिसांनी दिलेल्या माहितीनुसार, वीरेंद्र द्विवेदी हे दररोज सकाळी फिरायला जायचे. शनिवारी (१२ सप्टेंबर) सकाळी ते नेहमीप्रमाणे पाषाण परिसरातील नेकलेस गार्डन येथे फिरायला गेले होते. लष्कराच्या संशोधन आणि विकास संस्थेजवळ (डीआरडीई) भरधाव मोटारीने द्विवेदी यांना धडक दिली. अपघातात ते गंभीर जखमी झाले. अपघातानंतर मोटार चालकाने नागरिकांच्या मदतीने द्विवेदी यांना तातडीने खासगी रुग्णालयात दाखल केले. उपचारांदरम्यान त्यांचा मृत्यू झाला. द्विवेदी मूळचे मध्य प्रदेशातील रेवा येथील आहेत. द्विवेदी कुटुंबीय हे पाषाण येथील गुलमोहोर प्लाझा सोसायटीत राहत होते. ते हिंजवडीतील एका माहिती-तंत्रज्ञान कंपनीत कामाला होते.