पुण्यातील नवले पुलाजवळ अपघात; दुचाकीस्वाराचा मृत्यू

आंबेगाव पोलीस ठाण्यात गुन्हा दाखल

marathinews24.com

पुणे – बाह्यवळण मार्गावर नवले पुलाजवळ दुचाकी घसरुन दुचाकीस्वार ज्येष्ठाचा मृत्यू झाल्याची घटना घडली. दुचाकी घसरल्याने रस्ता ओलांडणारा पादचारी धडकेत जखमी झाला. मेघनारायण प्रल्हाद शिंदे (वय ६२, रा संतोषनगर, कात्रज) असे मृत्युमुखी पडलेल्या दुचाकीस्वाराचे नाव आहे. अपघातात पादचारी गणेश कोडीतकर (वय ५०, रा. आंबेगाव पठार, धनकवडी) हे जखमी झाले. कोडितकर यांनी याबाबत आंबेगाव पोलीस ठाण्यात फिर्याद दिली आहे.

जमीन मालकाची फसवणूक; कुख्यात बंडू आंदेकरसह तिघांविरुद्ध गुन्हा – सविस्तर बातमी 

पोलिसांनी दिलेल्या माहितीनुसार, गणेश कोडीतकर हे गुुरुवारी (१६ ऑक्टोबर) सकाळी साडेपाचच्या सुमारास बाह्यवळण मार्गावरुन निघाले होते. कोडितकर हे पॅनोरमा सोसायटीसमोरून रस्ता ओलांडत होते. त्यावेळी समोरून भरधाव वेगात आलेले दुचाकीस्वार शिंदे यांचे नियंत्रण सुटले आणि दुचाकी घसरली. कोडितकर यांना दुचाकीने धडक दिली. दुचाकी घसरल्याने मेघनारायण यांच्या डोक्याला गंभीर दुखापत झाली. घटनेची माहिती मिळताच पोलिसांनी कोडितकर आणि मेघनारायण यांना तातडीने रुग्णालयात दाखल केले. उपचारांदरम्यान दुचाकीस्वार मेघनारायण यांचा मृत्यू झाला. पोलीस हवालदार कांबळे तपास करत आहेत.