शहरात चोरट्यांचा धुमाकूळ
marathinews24.com
पुणे – शहरात घरफोडी करणाऱ्या चोरट्यांनी धुमाकूळ घातला. कोथरूड, भवानी पेठ, शिवणे, हडपसरमधील महंमदवाडी भागात चोरट्यांनी सदनिकेचे कुलूप तोडून सोन्याचे दागिने, रोकड असा ११ लाख रुपयांचा ऐवज लांबविला.
एटीएममधून पैसे काढणाऱ्या तरुणाला लुटले – सविस्तर बातमी
भवानी पेठेतील गुरुनानकनगर भागात भरदिवसा सदनिकेचे कुलूप तोडून चोरट्यांनी सोन्याचे दागिने आणि रोकड असा ४ लाख ९५ हजार रुपयांचा ऐवज लांबविल्याची घटना घडली. याबाबत एका व्यावसायिकाने खडक पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार व्यावसायिक हे गुरुनानकनगर भागात राहायला आहेत. तक्रादार आणि कुटुंबीय सोमवारी (२ फेब्रुवारी) सदनिका बंद करुन सकाळी अकराच्या सुमारास कामानिमित्त बाहेर पडले. चोरट्यांनी सदनिकेचे कुलूप तोडून चार लाख ९५ हजार रुपयांचा ऐवज लांबविला. दुपारी दोनच्या सुमारास तक्रारदार घरी परतले. त्यावेळी घरफोडीचा प्रकार उघडकीस आला. सहायक पोलीस निरीक्षक कुदळे तपास करत आहेत.
कोथरूड गावठाणातील तेजसगनगर परिसरात सदनिकेचे कुलूप तोडून चोरट्यांनी कपाटातील एक लाख ६७ हजार ६०० रुपयांचे सोन्याचे दागिने लांबविल्याची घटना घडली. याबाबत एका ज्येष्ठ नागरिकाने कोथरूड पोलीस ठाण्यात फिर्याद दिली आहे. पोलीस उपनिरीक्षक चव्हाण तपास करत आहेत. तसेच वारजे-एनडीए रस्त्यावरील शिवणे भागात सदनिकेचे कुलूप तोडून चोरट्यांनी ४८ हजार ८०८ रुपयांचे सोन्याचे दागिने लांबविल्याची घटना उघडकीस आली. याबाबत एकाने उत्तमनगर पोलीस ठाण्यात फिर्याद दिली आहे. पोलीस उपनिरीक्षक चेतन धनवडे तपास करत आहेत.
हडपसरमधील महंमदवाडी भागात घराचे कुलूप तोडून चोरट्यांनी तीन लाख ८३ हजार रुपयांचे दागिने लांबविले. याबाबत एका तरुणाने काळेपडळ पोलीस ठाण्यात फिर्याद दिली असून, पोलीस उपनिरीक्षक विनायक गुरव तपास करत आहेत.
