ऐन दिवाळीत लूटमारीच्या घटनेमुळे घबराट
marathinews24.com
पुणे – शहरातील बाजीराव रस्ता परिसरात व्यावसायिकाला धमकावून त्याच्याकडील १ लाख ३० हजारांची रोकड लुटण्यात आल्याची घटना घडली. याप्रकरणी चोरट्यांविरुद्ध खडक पोलिसांनी गुन्हा दाखल केला. ६० वर्षीय व्यावसायिकाने खडक पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, दुचाकीस्वार चोरट्यंविरुद्ध गुन्हा दाखल करण्यात आला आहे.
बंडू आंदेकर टोळीतील गुंड गजाआड – सविस्तर बातमी
पोलिसांनी दिलेल्या माहितीनुसार, तक्रारदार व्यावसायिकाचे सदाशिव पेठेतील कुमठेकर रस्ता परिसरात इमिटेशन ज्वेलरीचे दुकान आहे. एक ग्रॅम सोन्याचे दागिन्यांची विक्री केली जाते. दिवाळीमुळे गुरुवारी रात्री उशीरापर्यंत दुकान सुरू होते. व्यावसायिक शुक्रवार पेठेत राहायला आहेत. रात्री साडेदहाच्या सुमारास दुकान बंद करुन व्यावासायिक दुचाकीवरुन घरी निघाले होते. व्यवसायातून जमा झालेली एक लाख ३० हजारांची रोकड त्यांनी दुचाकीच्या डिक्कीत ठेवली होती.
बाजीराव रस्त्यावरील टेलीफोन भवनजवळील गल्लीतून ते रात्री घरी निघाले होते. त्यावेळी दुचाकीवरुन आलेल्या दोन चोरट्यांनी त्यांना अडवले आणि जीवे मारण्याची धमकी दिली. व्यावसायिकाला धक्काबुक्की केली. व्यावसायिकाने घाबरून दुचाकीच्या डिक्कीत ठेवलेली १ लाख ३० हजारांची रोकड चोरट्यांना दिली. चोरटे भरधाव वेगात दुचाकीवरुन पसार झाले. या घटनेची माहिती घाबरलेल्या व्यावसायिकाने खडक पोलीस ठाण्यात दिली.
वरिष्ठ पोलीस निरीक्षक शशिकांत चव्हाण यांनी घटनास्थळी भेट दिली. पोलिसांनी बाजीराव रस्ता,सुभाषनगर परिसरातील सीसीटीव्ही कॅमेऱ्यांनी केलेले चित्रीकरण तपासले आहे. पसार झालेल्या चोरट्यांचा माग काढण्यात येत आहे.
लूटमारीची दुसरी घटना
दुचाकीस्वार व्यापाऱ्याला धमकावून त्याच्याकडील ४५ हजारांची रोकड लुटण्यात आल्याची घटना बिबवेवाडी-गंगाधाम रस्त्यावर नुकतीच घडली. १५ ऑक्टोबर रोजी सकाळी दहाच्या सुमारास ते बिबवेवाडी-गंगाधाम रस्त्याने निघाले होते. त्यावेळी दुचाकीवरून आलेल्या चोरट्यांनी त्यांना अडवले. चोरट्यांनी त्यांना धमकावून खिशातील ४५ हजारांची रोकड लुटली. व्यापाऱ्याने आरडाओरडा केला. दिवाळीत व्यापाऱ्यांना लूटण्यात आल्याची दुसरी घटना घडल्याने घबराट उडाली आहे.
