शहरात दुकानांतून रोकड चोरीचे प्रकार वाढले
marathinews24.com
पुणे – वस्त्रदालनाच्या खिडकीचे गज उचकटून चाेरट्यांनी गल्ल्यातील ४ लाख ६० हजार रुपयांची रोकड चोरुन नेल्याची घटना हडपसर-सासवड रस्त्यावरील ऊरळी देवाची परिसरात घडली. याप्रकरणी चोरट्यांविरुद्ध गुन्हा दाखल करण्यात आला आहे. याबाबत वस्त्रदालनाच्या मालकांनी फुरसुंगी पोलीस ठाण्यात फिर्याद दिली आहे.
गोळीबार करणारा बिष्णोई टोळीतील एक जण ताब्यात – सविस्तर बातमी
पोलिसांनी दिलेल्या माहितीनुसार, हडपसर सासवड रस्त्यावर ऊरळी देवाची परिसरात नवल टेक्सटाईल मार्केट हे वस्त्रदालन आहे. वस्त्रदालनाच्या मागील बाजूस असलेल्या खिडकीचे लोखंडी गज उचकटून चोरट्यांनी गल्ल्यातील चार लाख ६० हजार रुपयांची रोकड चोरुन नेल्याची घटना शुक्रवारी (३ जुलै) मध्यरात्री घडली. सकाळी वस्त्रदालन उघडल्यानंतर रोकड चोरीचा प्रकार उघडकीस आला. चोरट्यांनी वस्त्रदालनातील दूरचित्रवाणी संचाचे नुकसान केल्याचा प्रकार उघडकीस आला आहे. पोलिसांनी घटनास्थळाची पाहणी केली असून, सीसीटीव्ही चित्रीकरण तपासले आहे. पसार झालेल्या चोरट्यांचा माग काढण्यात येत असून, पोलीस उपनिरीक्षक पवार तपास करत आहेत.
शहर परिसरात गेल्या काही महिन्यांपासून दुकानांचे कुलूप तोडून रोकड चोरीला जाण्याच्या घटना वाढल्या आहेत.
