उत्तमनगर येथील घटना
marathinews24.com
पुणे – बांधकामाचे भाडे वाढवून देणे आणि ठरलेल्या कराराबाहेरील जादा काम करण्यासाठी दबाव आणून मानसिक छळ केल्यामुळे ५४ वर्षीय ठेकेदाराने गळफास लावून आत्महत्या केल्याची धक्कादायक घटना उत्तमनगर परिसरात घडली. याप्रकरणी संतोष उभे (रा. मु.पो. कोंढूर, ता. मुळशी, जि. पुणे) याच्यावर उत्तमनगर पोलिस ठाण्यात गुन्हा दाखल करण्यात आला आहे. याबाबत श्रीरंग ज्ञानोबा वांजळे (वय २१ वर्षे, रा. फ्लॅट नंबर ४०१, शिवांजली अपार्टमेंट, कार्ले गल्ली, सरडेबाग, उत्तमनगर, पुणे) यांनी फिर्याद दिली आहे.
ग्राहकांकडून गोळा केलेली सव्वासात लाखांची रक्कम हडप – सविस्तर बातमी
पोलिसांनी दिलेल्या माहितीनुसार, मे २०२६ ते दि. १८ जून रोजीच्या दरम्यान फिर्यादी यांचे वडील ज्ञानोबा श्रीहरी वांजळे (वय ५४ वर्षे) हे ठेकेदार असून आरोपी संतोष उभे याच्या बंगल्याचे बांधकाम करत होते. त्या वेळी स्लॅबच्या लोखंडी प्लेट व लाकडी बांबू काढून न दिल्याने त्याचे भाडे दिवसेंदिवस वाढत चालले होते. तसेच आरोपीने ठरलेल्या कामाव्यतिरिक्त इतर जादा काम त्याच पैशात करून देण्याबाबत वडिलांकडे तगादा लावला. “तुला बघून घेतो, यापुढे कुठेच काम करू देणार नाही” तुझी पोलिसात तक्रार करतो अशी धमकी देऊन छळ केल्याने, या त्रासाला कंटाळून ज्ञानोबा वांजळे यांनी गळफास घेऊन आत्महत्या केली.
