कोंढव्यातील टिळेकरनगरमधील घटना
marathinews24.com
पुणे – दुचाकीस्वार दाम्पत्याची दुचाकी घसरून अपघात झाल्यानंतर त्यांना मदतीचा बहाण्याने तरुणाच्या गळ्यातील ७५ हजारांची सोनसाखळी लांबविल्याची घटना घडली. चोरट्यांनी दुचाकी चावी काढून पसार झाल्याची घटना कोंढव्यातील टिळेकरनगर भागात घडली. तरुणाने कोंढवा पोलीस ठाण्यात फिर्याद दिली आहे. त्यांनी दिलेल्या फिर्यादीनुसार दोन चोरट्यांविरुद्ध गुन्हा दाखल केला आहे.
तब्बल ५० पेक्षा जास्त घरफोड्या करणारा सराईत गजाआड – सविस्तर बातमी
पोलिसांनी दिलेल्या माहितीनुसार, तक्रारदार तरूण हा पत्नीसह कोंढवा बुद्रुक भागात राहायला आहेत. दोघेही १८ जूनला कामानिमित्त बाहेर गेले होते. दुचाकीवरुन रात्री दहाच्या सुमारास ते घरी जात होते. टिळेकरनगर परिसरातील श्रीराम चौकात खड्ड्यात त्यांची दुचाकी घसरली. दोघेजण खाली पडल्यानंतर त्यांना मदतीच्या बहाणा करून चोरटे तेथे आले. मदतीचा बहाणा करुन चोरट्यांनी तरुणाच्या गळ्यातील सोनसाखळी लांबविली. त्यानंतर त्यांच्या दुचाकीची चावी घेउन चोरटे पसार झाले. याप्रकरणी सहायक पोलीस निरीक्षक सचिन थोरात तपास करत आहेत.
पीएमपीएल प्रवासी महिलेची दागिने लंपास
पीएमपीएल बसप्रवासात महिलेच्या हातातील ७० हजार रूपये किंंमतीची सोन्याची पाटली कटरने कापून नेल्याची घटना १८ जूनला घडली आहे. याप्रकरणी महिलेने कोंढवा पोलीस ठाण्यात गुन्हा दाखल केला आहे. पोलिसांनी दिलेल्या माहितीनुसार, तक्रारदार महिला बुधवारी (१८ जून) दुपारी कात्रज येथील पीएमपीएल बस स्थानकाकडून येवलेवाडीकडे जात होत्या. बसमध्ये गर्दीचा फायदा घेउन चोरट्याने कटरने महिलेच्या हातातील ७० हजारांची बांगडी कापून नेली. पोलीस उपनिरीक्षक खराडे तपास करत आहेत.
