पीडितांची अर्थसहाय्याची प्रकरणे कागदपत्रांअभावी रखडू नयेत; पोलीस विभागाला सूचना
marathinews24.com
पुणे – जिल्हा दक्षता व नियंत्रण समितीची जिल्हास्तरीय बैठक जिल्हाधिकारी कार्यालयात घेण्यात आली. कागदपत्रांअभावी पीडितांना अर्थसहाय्य देण्याची प्रकरणे प्रलंबित राहू नयेत यासाठी पोलीस विभागाकडे असलेले जातीचे दाखले, वैद्यकीय प्रमाणपत्र समाजकल्याण विभागाला उपलब्ध करुन द्यावेत, अशा सूचना समितीचे सदस्य सचिव तथा सहायक आयुक्त विशाल लोंढे यांनी दिल्या. यावेळी समितीचे शासकीय व अशासकीय सदस्य उपस्थित होते.
अन्न व औषध प्रशासनाची पुणे विभागात धडक कारवाई; १३.७१ लाखांचा मुद्देमाल जप्त – सविस्तर बातमी
या समितीद्वारे अनुसूचित जाती व जमाती (अत्याचार प्रतिबंध) अधिनियम १९८९ बाबत जाणीव- जागृती करण्यासाठी जातीय सलोखा वृद्धींगत होण्यासाठी तालुकास्तरावर कार्यशाळा घ्याव्यात, पोलीस विभागाने वस्तुस्थिती तपासून आवश्यक त्या ठिकाणी गुन्हे दाखल करावेत, उच्च न्यायालयातील प्रकरणांचा पाठपुरावा करण्यासाठी प्रतिनिधी नियुक्त करावा व पुढील बैठकीत उच्च न्यायालयातील प्रकरणांची संख्या सादर करावी. गुन्ह्यांची संख्या जास्त असलेल्या तालुक्यात संयुक्तिक बैठका घेऊन ६० दिवसांच्या आत गुन्ह्यांचा तपास पूर्ण करण्याची कार्यवाही करावी, असे लोंढे यांनी सांगितले.
बैठकीत तालुकानिहाय प्रलंबित प्रकरणांचा आढावा घेण्यात आला. तसेच उपस्थित तक्रारदारांना त्यांचे म्हणणे मांडण्याची संधी देण्यात आली.
