पर्यटन कंपनीच्या संचालकांविरुद्ध गुन्हा दाखल
marathinews24.com
पुणे – पर्यटन कंपनीत काम करणाऱ्या कर्मचारी महिलेला अनुभव प्रमाणपत्र न देेणे, तसेच तिला देण्यात आलेल्या त्रासामुळे तिने आत्महत्या केली. वर्षभरानंतर याप्रकरणी पर्यटन कंपनीच्या संचालकांविरुद्ध नांदेड सिटी पोलिसांनी गुन्हा दाखल केला. अश्विनी सचिन जोशी (वय ४६, रा. जोशी अपार्टमेंट, हिंगणे खुर्द) असे आत्महत्या केलेल्या महिलेचे नाव आहे. याप्रकरणी जीवन जगन्नाथ हेंद्रे (वय ५८, रा. श्रीनिवास क्राॅसओव्हर काऊंटी, लगडमळा, धायरी) यांच्याविरुद्ध गुन्हा दाखल करण्यात आला. सचिन जोशी (वय ५१) यांनी नांदेड सिटी पोलीस ठाण्यात फिर्याद दिली आहे.
किरकोळ कारणावरुन ज्येष्ठ व्यापाऱ्याला बेदम मारहाण – सविस्तर बातमी
पोलिसांनी दिलेल्या माहितीनुसार, हेंद्रे यांची लाईफलाईन टुर्स अँड ट्रॅव्हल्स कंपनी आहे. या कंपनीत जोशी २०११ ते २०२४ पर्यंत नोकरीस होत्या. या काळात त्यांनी चार ते पाच वेळा काम सोडले होते. दरम्यान, जोशी यांना कर्वेनगर भागातील एका पर्यटन कंपनीत नोकरी लागली. तेथे त्या रूजू झाल्या. जोशी यांनी हेेंद्रे यांच्याकडे अनुभव प्रमाणपत्र मागितले होते. मात्र, हेंद्रे यांनी त्यांना प्रमाणपत्र दिले नाही. जोशी कर्वेनगरमधील कंपनीत काम करत होत्या. हेंद्रे यांनी संबंधित कंपनीच्या संचालकांची भेट घेऊन जोशी यांना कामावर ठेऊ नका, असे सांगितले होते. त्यानंतर जोशी यांनी कर्वेनगरमधील कंपनीतील नोकरी सोडली. हेंद्रे यांच्या त्रासाला कंटाळून पत्नीने गेल्या वर्षी ८ फेब्रुवारीला आत्महत्या केली, अशी फिर्याद जोशी यांचे पती सचिन यांनी नुकतीच पोलिसांकडे दिली. त्यानंतर आत्महत्येस प्रवृत्त केल्याप्रकरणी हेंद्रे यांच्याविरुद्ध गुन्हा दाखल करण्यात आला. पोलीस उपनिरीक्षक स्वप्नाली गायकवाड तपास करत आहेत.
