लष्कर पोलिस ठाण्यात फसवणुकीचा गुन्हा दाखल
marathinews24.com
पुणे – गिफ्ट वस्तू पुरवठ्याच्या व्यवसायातून चांदीची नाणी पुरवूनही त्याचे पैसे न दिल्याप्रकरणी चार जणांविरुद्ध लष्कर पोलिस ठाण्यात फसवणुकीचा गुन्हा दाखल केला आहे. यात तब्बल ७ कोटी १३ लाख ६२ हजार २७६ रुपयांची फसवणूक झाल्याचा आरोप आहे.
याप्रकरणी बावधन येथील ड्रीम रिदम सोसायटीत राहणाऱ्या ३९ वर्षीय महिलेने तक्रार दिली आहे. त्यानुसार राहुल दर्शन जगताप, एंजल राहुल जगताप, सुशीला दर्शन जगताप (सर्व रा. सानपाडा, नवी मुंबई) तसेच गणेश चेट्टीयार (रा. एनआयबीएम रोड, कोंढवा) यांच्यावर गुन्हा दाखल करण्यात आला आहे. ही घटना १३ डिसेंबर २०२३ ते २४ जानेवारी २०२४ या कालावधीत घडल्याचे तक्रारीत नमूद आहे.
नोकरीच्या आमिषाने तरुणांची फसवणूक – सविस्तर बातमी
पोलिसांच्या माहितीनुसार, तक्रारदार महिलेचा गिफ्ट वस्तू पुरवठ्याचा व्यवसाय आहे. आरोपींनी रिजॉइस इव्हेंट मॅनेजमेंट ऑर्गनायझर कंपनीमार्फत त्यांच्याकडून मोठ्या प्रमाणात चांदीची नाणी मागवली होती. त्यानुसार तक्रारदारांनी त्यांना सुमारे ७ कोटी ४९ लाख २४ हजार ८३० रुपयांची चांदीची नाणी पुरवली. मात्र, या व्यवहारातील ४ कोटी २५ लाख ५७ हजार ३७३ रुपये तक्रारदारांना देण्यात आले नाहीत. जीएसटीसह थकीत रक्कम, मोबदला आणि दंडाची रक्कम मिळून एकूण ७ कोटी १३ लाख ६२ हजार २७६ रुपयांची आर्थिक फसवणूक झाल्याचे तक्रारीत नमूद आहे. लष्कर पोलिस ठाण्यात गुन्हा दाखल असून, प्रकरणाचा पुढील तपास आर्थिक गुन्हे शाखेतील पोलीस उपनिरीक्षक पी. बी. कणसे करत आहेत
