नोकरी लावण्याचे आमिष दाखवून उकळत होता पैसे
marathinews24.com
पुणे – वेगवेगळ्या कन्सलटंन्सीमार्फत तरुणांना नामांकित कंपनीत नोकरी लावण्याचे आमिष दाखवून त्यांच्याकडून पैसे उकळत तब्बल १ कोटी ५१ लाख ८७ हजार रुपयांची फसवणूक केल्याचा प्रकार उघडकीस आला आहे. याप्रकरणी पोलिसांनी गुन्हा दाखल करून आरोपींनी अटक केली आहे.
वडगाव पुलावर वाहनाच्या धडकेत एकजण ठार – सविस्तर बातमी
‘कॉन्टम सॉफ्ट टेक्नॉलॉजी प्रा. लि’च्या सीईओ निखिलेश्वर अशोक क्षीरसागर (मूळ रा. अमरावती), अमोल रघुनाथराव शेवणे, डॉ. केतन शेवटकर यांच्याविरुद्ध गुन्हा दाखल केला आहे. पोलिसांनी सीईओसह इतरांना अटक केली आहे. विश्वास ज्ञानेश्वर पाटील (वय ३३, रा. विशालनगर, न्यू डीपी रोड, पिंपळे निलख) विमानतळ पोलिस ठाण्यात तक्रार दिली आहे.
पोलिसांच्या माहितीनुसार, कॉन्टम सॉफ्ट टेक्नॉलॉजी प्रा. लि. ही कंपनी आहे. त्याचे ऑफिस विमाननगर येथे निको गार्डन समोरील सॉलिटर बिझनेस हब येथे आहे. आरोपींनी विविध कन्सल्टन्सीमार्फत तक्रारदार आणि इतर तरुणांना कंपनीत नोकरी देण्याचे आमिष दाखवले. त्यांच्याकडून काम करून घेत असतानाही पगार देण्यात आला नाही. तसेच कर्मचाऱ्यांचे भविष्य निर्वाह निधी (पीएफ) खाते उघडून त्यामध्ये कोणतीही रक्कम जमा न करता त्या पैशांचा अपहार केल्याचा आरोप आहे. तक्रारदार विश्वास पाटील यांच्याकडून २ लाख पाच हजार रुपये घेतले आहे. तर, इतर अनेक तरुणांकडूनही पैसे उकळण्यात आले. अशा प्रकारे १ कोटी ५१ लाख ८७ हजार रुपयांची आर्थिक फसवणूक केल्याचे तक्रारीत नमूद आहे. याप्रकरणी विमानतळ पोलिस ठाण्यात गुन्हा दाखल केला असून पुढील तपास केला जात आहे.
