केजमध्ये महसूलच्या आवारातून ट्रॅक्टर चोरीला; सीसीटीव्हीच्या आधारे चोराचा शोध सुरू
marathinews24.com
बीड : (अनंत जाधव) – जिल्ह्यात अवैध गौण खनिज माफियांनी आता थेट प्रशासनालाच आव्हान देण्यास सुरुवात केली आहे. केज येथील महसूल विभाग आणि पोलिसांनी संयुक्त कारवाई करत ताब्यात घेतलेला वाळू/मुरुमाचा ट्रॅक्टर चक्क सरकारी कार्यालयाच्या परिसरातून पळवून नेल्याची खळबळजनक घटना उघडकीस आली आहे. दि. २५ डिसेंबरला रात्रीच्या सुमारास केज-कळंब रोडवर मुरूमाची अवैध वाहतूक होत असल्याची माहिती महसूल प्रशासनाला मिळाली होती. महसूल कर्मचाऱ्यांनी तत्परता दाखवत हा ट्रॅक्टर (ट्रॉलीसह) ताब्यात घेतला होता.
कुणबी प्रमाणपत्र मिळत नसल्याने शेतकऱ्याची आत्महत्या – सविस्तर बातमी
जप्त केलेली वाहने सुरक्षिततेसाठी सरकारी कार्यालयाच्या परिसरात उभी करण्यात आली होती. त्यानंतर चोरट्याने बनावट चावीचा वापर केला. रात्रीच्या अंधाराचा फायदा घेत ट्रॅक्टर चोरून नेला. अज्ञात व्यक्तीने बनावट चावीचा वापर करून कार्यालयाच्या परिसरात उभा असलेला ट्रॅक्टर आणि ट्रॉली सुरू केली आणि तिथून पलायन केले . सकाळी जेव्हा महसूल कर्मचाऱ्यांच्या ही बाब लक्षात आली, तेव्हा एकच खळबळ उडाली.सीसीटीव्ही फुटेज तपासण्याचे काम सुरू असून, ट्रॅक्टर चोरणारा आरोपी लवकरच पोलिसांच्या जाळ्यात अडकण्याची शक्यता आहे. सरकारी मालमत्तेच्या आणि जप्त केलेल्या वाहनांच्या सुरक्षेचा प्रश्न ऐरणीवर आला आहे.
