७.३० लाखांचे सोन्याचे दागिने गेले होते चोरी
marathinews24.com
पुणे – घरकामाच्या निमित्ताने घरात ये-जा करणाऱ्या मोलकरणीनेच मालकिणीचा विश्वासघात करत तब्बल ७.३० लाख रुपयांचे सोन्याचे दागिने चोरल्याची घटना हडपसर परिसरात उघडकीस आली आहे. हडपसर पोलिसांनी कसून तपास करून अंबिका सदाशिव खडगेकर (वय ३८, रा. साडेसतरा नळी, हडपसर, पुणे) हिला अटक केली आहे. तिच्याकडून चोरी गेलेले सर्व दागिने जप्त करण्यात आले आहे.
बसची वाट पाहणाऱ्या महिलेची सोनखाखळी चोरणाऱ्याला बेड्या – सविस्तर बातमी
पोलिसांनी दिलेल्या माहितीनुसार, ४ जुलै २०२६ रोजी फिर्यादी यांच्या घरातील मास्टर बेडरूममध्ये ठेवलेल्या बॅगेतून ७ लाख २० हजार रुपयांचे सोन्याचे दागिने चोरीला गेल्याची तक्रार हडपसर पोलिस ठाण्यात दाखल करण्यात आली होती. या प्रकरणी गुन्हा दाखल करण्यात आला होता. तपासादरम्यान घराचे कुलूप किंवा कपाट तोडल्याच्या कोणत्याही खुणा आढळल्या नाहीत.
त्यामुळे घरात नियमित येणाऱ्या व्यक्तीवर संशय घेत तपासाची सूत्रे वेगाने फिरविण्यात आली. वरिष्ठ पोलिस निरीक्षक विश्वजीत काईंगडे यांच्या मार्गदर्शनाखाली सहायक पोलिस निरीक्षक विजय पाटील, पोलीस उपनिरीक्षक सत्यवान गेंड आणि तपास पथकाने घरात काम करणारी अंबिका खडगेकर हिची चौकशी केली. सुरुवातीला तिने उडवाउडवीची उत्तरे दिली. मात्र विश्वासात घेऊन चौकशी केल्यानंतर पैशांची गरज असल्याने आपणच दागिने चोरल्याची कबुली तिने दिली.
आरोपीकडून १५.५५० ग्रॅम वजनाची सोन्याची बांगडी, ९.५५० ग्रॅम वजनाची सोन्याची साखळी आणि १५.८०० ग्रॅम वजनाची रंगीबेरंगी मण्यांची सोन्याची चेन असा एकूण ७ लाख ३० हजार रुपयांचा मुद्देमाल जप्त करण्यात आला आहे. या गुन्ह्याचा पुढील तपास सहायक पोलिस निरीक्षक विजय पाटील व पोलीस हवालदार निलेश किरवे करीत आहेत.
ही कारवाई पोलिस उपायुक्त (परिमंडळ ६) जीवन बेनिवाल, सहाय्यक पोलिस आयुक्त अतुलकुमार नवगिरे यांच्या मार्गदर्शनाखाली वरिष्ठ पोलिस निरीक्षक विश्वजीत काईंगडे, पोलिस निरीक्षक (गुन्हे) निलेश जगदाळे यांच्या सूचनेनुसार सहायक पोलिस निरीक्षक विजय पाटील, पोलीस उपनिरीक्षक सत्यवान गेंड, पोलीस अंमलदार दीपक कांबळे, निलेश किरवे, बापू लोणकर, भाऊसाहेब कटके, अजित मदने, कुंडलिक केसकर, भगवान हंबर्डे, अनिरुद्ध सोनवणे, महेश चव्हाण, तुकाराम झुंजार, आकाश धावडे, विजय कानेकर, धीरज शेलार, महावीर लोंढे आणि शितल खळदकर यांच्या पथकाने केली.
