२७ वर्षीय सैफ खानचा उपचारांपूर्वीच मृत्यू; टेम्पो आणि टँकर चालकाविरुद्ध गुन्हा दाखल
marathinews24.com
पुणे – पाण्याच्या टँकरच्या धडकेत दुचाकीस्वार तरुणाचा मृत्यू झाल्याची घटना मुंढवा-घोरपडी रस्त्यावर घडली. या प्रकरणी टँकर चालक, तसेच एका टेम्पो चालकाविरुद्ध गुन्हा दाखल करण्यात आला. टेम्पो चालकाने दरवाजा उघडा ठेवला होता. त्या वेळी दुचाकीस्वार तरुण दरवाज्यावर आदळल्याने रस्त्यात पडला. पाठीमागून येणाऱ्या टँकरच्या चाकाखाली सापडून तरुणाचा मृत्यू झाला. सैफ खान (वय २७) असे मृत्युमुखी पडलेल्या तरुणाचे नाव आहे. याबाबत सैफ याची आई मुन्सरा शफी खान (वय ५०, रा. पठाण गल्ली, कमलनगर, जि. बिदर, कर्नाटक) यांनी मुंढवा पोलीस ठाण्यात फिर्याद दिली आहे.
पोलिस असल्याचे भासवून ऑनलाइन ३७ हजार ९०० रुपये घेतले – सविस्तर बातमी
पोलिसांनी दिलेल्या माहितीनुसार, दुचाकीस्वार सैफ हा १६ ऑगस्ट रोजी दुपारी साडेबाराच्या सुमारास मुंढव्यातून घोरपडीकडे निघाला होता. त्या वेळी मुंढव्यातील सीएनजी पंपाजवळ रस्त्याच्या कडेला टेम्पो थांबला होता. टेम्पो चालकाने टेम्पोचा दरवाजा उघडा ठेवला होता. दुचाकीस्वार सैफ हा दरवाज्यावर आदळला. त्याचे नियंत्रण सुटल्याने तो रस्त्यात पडला. पाठीमागून येणाऱ्या टँकरच्या चाकाखाली सापडून त्याचा मृत्यू झाला. अपघातानंतर पोलिसांनी घटनास्थळी भेट दिली. गंभीर जखमी झालेल्या सैफ याला रुग्णालयात दाखल करण्यात आले. उपचारांपूर्वीच त्याचा मृत्यू झाल्याचे वैद्यकीय तज्ज्ञांनी सांगितले. अपघातास जबाबदार ठरल्या प्रकरणी टेम्पो चालक, तसेट टँकर चालकाविरुद्ध गुन्हा दाखल करण्यात आला आहे. पोलीस उपनिरीक्षक पाटील तपास करत आहेत.
