सोलापूर रस्त्यावरील नलिनी सोसायटीसमोर पहाटेच्या सुमारास घडला प्रकार
marathinews24.com
पुणे – पोलीस असल्याचे खोटे सांगून दुचाकीवरून आलेल्या अज्ञात व्यक्तीने तरुणाची लुटल्याचा प्रकार वानवडी परिसरात घडला. तक्रारदाराच्या दोन मित्रांच्या मोबाइलमधील फोन-पे खात्याचा वापर करून ३७ हजार ९०० रुपये ऑनलाइन व्यवहार करण्यात आले. त्यानंतर मोबाइलचा पासवर्ड आणि फोन-पेचा पिन क्रमांक घेतला. याप्रकरणी वानवडी पोलिस ठाण्यात दुचाकीस्वाराविरुद्ध गुन्हा दाखल केला आहे. हा प्रकार २३ ऑगस्टला पहाटे तीन वाजून ४० मिनिटांच्या सुमारास नलीनी सोसायटीसमोर, सोलापूर रस्त्यावर घडला.
श्वान अंगावर सोडून तरुणाला केली दुखापत – सविस्तर बातमी
तक्रारदार त्याच्या दोन मित्रांसोबत जात असताना त्यांच्या मागून काळ्या रंगाच्या दुचाकीवरून हेल्मेट घातलेला सुमारे २५ ते ३० वर्षांचा अज्ञात व्यक्ती आला. त्याने तक्रारदाराला आपण पोलिस असल्याचे सांगितले. त्यानंतर त्याने तक्रारदार आणि त्यांच्या मित्रांकडील मोबाइलची माहिती घेतली. आरोपीने तक्रारदाराच्या दोन मित्रांच्या मोबाइलमधील फोन-पे खात्यांद्वारे तक्रारदाराच्या फोन-पे खात्यावर एकूण ३७ हजार ९०० रुपये ऑनलाइन हस्तांतरित केले. तक्रारदाराच्या मोबाइलचा पासवर्ड आणि फोन-पेचा पिन क्रमांकही जाणून घेतला. त्यानंतर आरोपी दुचाकीवरून तेथून निघून गेला. या प्रकरणी वानवडी पोलिसांनी भारतीय न्याय संहितेच्या कलम २०४ आणि ३१८(४) नुसार गुन्हा दाखल केला असून, अज्ञात आरोपीचा शोध सुरू आहे.
