व्हिडिओ कॉन्फरन्सिंगद्वारे सर्व तहसीलदार, मुख्याधिकारी आणि संबंधित कटक मंडळांची आढावा बैठक
marathinews24.com
पुणे – जनगणना २०२७ च्या पहिल्या टप्प्याची प्रभावी अंमलबजावणी सुनिश्चित करण्यासाठी निवासी उपजिल्हाधिकारी तथा जिल्हा जनगणना अधिकारी, पुणे यांच्या अध्यक्षतेखाली आज व्हिडिओ कॉन्फरन्सिंगद्वारे सर्व तहसीलदार, मुख्याधिकारी आणि संबंधित कटक मंडळांची आढावा बैठक घेण्यात आली.
बैठकीत पुणे जिल्ह्यातील जनगणनेचे कामकाज सुरळीत व नियोजनबद्ध पद्धतीने पार पाडण्यासाठी आवश्यक असणाऱ्या प्राथमिक तयारीबाबत सविस्तर मार्गदर्शन करण्यात आले. जनगणना हा अत्यंत महत्त्वाचा आणि व्यापक प्रशासकीय उपक्रम असून त्यासाठी तालुका स्तरावर आवश्यक मनुष्यबळ, अधिकारी व कर्मचारी वर्ग उपलब्ध करून देण्याबाबत सर्व संबंधित विभागांना सूचित करण्यात आले.
जनगणना प्रक्रिया यंदा डिजिटल पद्धतीने राबविण्यात येणार असल्याने घरगुती यादी (House Listing) अचूक व अद्ययावत तयार करण्याबाबत विशेष भर देण्यात आला. घरगट यादी तयार करताना भौगोलिक सीमा, नव्याने स्थापन झालेल्या वसाहती, स्थलांतरित कुटुंबे आदी बाबींची अचूक नोंद करण्याच्या सूचना देण्यात आल्या.
तसेच, डिजिटल साधनांचा प्रभावी वापर, प्रशिक्षण कार्यक्रमांचे नियोजन, तांत्रिक अडचणींचे वेळेत निराकरण आणि सर्व विभागांमधील समन्वय यावरही बैठकीत चर्चा करण्यात आली. जनगणना २०२७ चे काम वेळेत व गुणवत्तापूर्ण पद्धतीने पूर्ण करण्यासाठी सर्व यंत्रणांनी सक्रिय सहभाग नोंदवावा, असे आवाहन निवासी उपजिल्हाधिकारी यांनी यावेळी केले.
