हडपसरमधील घटना
marathinews24.com
पुणे – फ्लॅटचे कुलूप तोडून चोरट्यांनी १ लाख ३८ हजार रुपयांचे सोन्याचे दागिने लांबविल्याची घटना हडपसर भागातील एका सोसायटीत घडली. याबाबत एकाने हडपसर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे.
वारजेत अपघातात दुचाकीस्वाराचा मृत्यू, एकजण जखमी – सविस्तर बातमी
पोलिसांनी दिलेल्या माहितीनुसार, तक्रारदार हे हडपसरमधील गोपाळपट्टी परिसरातील जय मल्हार सोसायटीत राहायला आहेत. १३ जूनला तक्रारदार आणि कुटुंबीय हे बाहेरगावी गेले होते. त्यावेळी चोरट्यांनी फ्लॅटचे कुलूप तोडून चोरट्यांनी कपाटातून १ लाख ३८ हजारांचे सोन्याचे दागिने चोरुन नेल्याचा प्रकार उघडकीस आला. सहायक पोलीस निरीक्षक जाधव तपास करत आहेत. हडपसर भागातील वैभव चित्रपटगृह परिसरातील फ्लॅटमधून ३९ लाखांचे दागिने लांबविण्यात आल्याची घटना नुकतीच घडली होती.
घरकाम करणार्‍या महिलेकडून ऐवज लंपास
घरकाम करणार्‍या महिलेने १ लाख १५ हजारांचे सोन्याचे दागिने लांबविल्याची घटना बिबवेवाडी भागात घडली. याबाबत महिलेने भारती विद्यापीठ पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिलेच्या घरी घरकामासाठी एक महिला यायची. महिलेचे लक्ष नसल्याची संधी साधून कपाटातून १ लाख १५ हजारांचे दागिने चोरुन नेण्यात आल्याचा प्रकार नुकताच उघडकीस आला.
घरकाम करणारी महिला ऐवज चोरुन पसार झाल्यानंतर ती कामावर आली नाही. त्यामुळे तक्रारदार महिलेचा संशय बळावला. त्यांनी तिच्या मोबाइल क्रमांकावर संपर्क साधला. तेव्हा मोबाइल क्रमांक बंद असल्याचे लक्षात आले. पोलीस उपनिरीक्षक स्वप्नील पाटील तपास करत आहेत.
