महिलेविरुद्ध गुन्हा दाखल
marathinews24.com
पुणे – ज्येष्ठ महिलेच्या घरात काम करणाऱ्या महिलेने दोन लाख रुपयांच्या हिरेजडीत तीन अंगठ्या चोरुन नेल्याची घटना कोथरूड परिसात घडली. याबाबत एका ज्येष्ठ महिलेने कोथरूड पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, घरकाम करणाऱ्या महिलेविरुद्ध गुन्हा दाखल करण्यात आला आहे.
पीएमपी प्रवासी महिलेचे दागिने चोरीला – सविस्तर बातमी
पोलिसांनी दिलेल्या माहितीनुसार, तक्रारदार ६२ वर्षीय महिला कोथरूडमधील महात्मा सोसायटीत राहायला आहेत. त्यांनी गेल्या महिन्यात एका कार्यक्रमावरुन आल्यानंतर शयनगृहातील टेबलवर हिरेजडीत सोन्याच्या तीन अंगठ्या ठेवल्या होत्या. त्यांचे लक्ष नसल्याची संधी साधून अंगठ्या चोरुन नेल्या. अंगठी चोरुन नेल्याचा प्रकार उघडकीस आल्यानंतर त्यांनी पोलिसांकडे नुकतीच तक्रार दिली. घरकाम करणाऱ्या महिलेने अंगठी चोरून नेल्याचा संशय त्यांनी फिर्यादीत व्यक्त केला आहे. पोलीस उपनिरीक्षक मोहन चव्हाण तपास करत आहेत.
मोटारीची काच फोडून दीड लाखांची रोकड चोरी
मोटारीची काच फोडून चोरट्यांनी दीड लाख रुपयांची रोकड चोरुन नेल्याची घटना येरवड्यातील कल्याणीनगर भागात नुकतीच घडली. याबाबत एका व्यावसायिकाने येरवडा पोलीस ठाण्यात फिर्याद दिली आहे. तक्रादार व्यावसायिक मार्केट यार्ड भागात राहायला आहेत. ते शनिवारी (४ जुलै) दुपारी दोनच्या सुमारास कामानिमित्त कल्याणीनगर भागात आले होते. लेक्सीकन स्कूलसमोरील रस्त्यावर त्यांनी मोटार लावली होती. चोरट्यांनी मोटारीची काच फोडून पिशवीत ठेवलेली दीड लाख रुपयांची रोकड चोरुन नेली. पोलीस उपनिरीक्षक किशोर बेरड तपास करत आहेत.
