डेक्कन पोलिस ठाण्यात गुन्हा दाखल
marathinews24.com
पुणे – इंटेरियर आणि फॅशन डिझायनिंग कंपनीत गुंतवणुकीवर मोठा परतावा देण्याचे आमिष दाखवून ६६ वर्षीय व्यक्तीची तब्बल २६ लाख १५ हजार रुपयांची फसवणूक झाली आहे. याप्रकरणी डेक्कन पोलिस ठाण्यात गुन्हा दाखल करण्यात आला आहे. ही घटना जून २०२१ पासून मे २०२६ कालावधीत घडली आहे.
मोटारीच्या धडकेत दुचाकीस्वार ज्येष्ठाचा मृत्यू – सविस्तर बातमी
पोलिसांनी दिलेल्या माहितीनुसार, तक्रारदार हे छत्तीसगडमधील दुर्ग जिल्ह्यातील भिलाई येथील स्मृतीनगर परिसरात राहायला आहेत. आरोपी अमित अगरवाल (रा. भांडारकर रस्ता) याने तक्रारदाराला इंडियन होम इंटेरियर अँड फॅशन डिझायनिंग नावाची नवी कंपनी सुरू करत असल्याचे सांगितले होते. या कंपनीत गुंतवणूक केल्यास मोठा आर्थिक फायदा होईल, तसेच कंपनीत पाच टक्के शेअर्स आणि गुंतवणुकीवर वार्षिक २५ टक्के निश्चित परतावा मिळेल, असे आमिष दाखवले होते. आश्वासनावर विश्वास ठेवून तक्रारदाराने आरोपीकडे १० लाख रुपये रोख आणि १० लाख रुपये बँक खात्यावर जमा केले. सुरुवातीला आरोपीने काही रक्कम परतावा म्हणून दिली होती. मात्र, त्यानंतर गुंतवलेले २० लाख रुपये आणि त्यावरील ६ लाख १५ हजार ८९० रुपयांचा परतावा अशी २६ लाख १५ हजार ८९० रुपयांची रक्कम परत न करता आरोपीने अपहार केला.
