जिल्हा क्रीडा अधिकारी जगन्नाथ लकडे यांचे युवक-युवतींनी सहभागी होण्याचे आवाहन
marathinews24.com
पुणे – या वर्षीच्या राज्यस्तरीय युवा महोत्सवाचे २९ डिसेंबर २०२५ ते १ जानेवारी २०२६ या कालावधीत ग. दि. माडगुळकर नाट्यगृह, पिंपरी-चिंचवड महानगरपालिका, निगडी येथे आयोजन करण्यात येणार असून या महोत्सवात अधिकाधिक युवक-युवतींनी सहभागी व्हावे, असे आवाहन जिल्हा क्रीडा अधिकारी जगन्नाथ लकडे यांनी केले आहे.
कलांमधून मिळते जीवन जगण्याची उमेद- डॉ. संगीता बर्वे – सविस्तर बातमी
युवकांचा सर्वांगीण विकास साधणे, भारतीय संस्कृती व परंपरेचे जतन करणे, युवकांमधील सुप्त गुणांना वाव देणे तसेच राष्ट्रीय एकात्मता बळकट करणे या उद्देशाने दरवर्षी जिल्हा, विभाग आणि राज्यस्तरीय युवा महोत्सवाचे आयोजन करण्यात येते. सन २०२५-२६ चा राज्यस्तरीय युवा महोत्सवाचे आयोजन करण्याची संधी जिल्ह्याला मिळाली आहे.
या महोत्सवात महाराष्ट्रातून पुणे, कोल्हापूर, लातूर, छत्रपती संभाजीनगर, नागपूर, अमरावती, नाशिक व मुंबई विभागांतील सुमारे ५०० युवक-युवती (वयोगट १५ ते २९ वर्षे) सहभागी होणार आहेत. महोत्सवात लोकगीत, लोकनृत्य, कथालेखन, चित्रकला, वक्तृत्व, काव्यलेखन आदी विविध स्पर्धांचे आयोजन करण्यात येणार आहे. या स्पर्धांमधील विजयी संघास १० ते १२ जानेवारी २०२६ दरम्यान दिल्ली येथे होणाऱ्या राष्ट्रीय युवा महोत्सवात महाराष्ट्र राज्याचे प्रतिनिधित्व करण्याची संधी मिळणार आहे.
याशिवाय, युवकांना त्यांचे अभिनव विज्ञान व तंत्रज्ञान प्रकल्प सादर करण्यासाठी विज्ञान प्रदर्शनाचे आयोजन करण्यात येणार आहे. युवकांमध्ये विज्ञान व तंत्रज्ञानाविषयी जिज्ञासा निर्माण करणे, सामाजिक विकासासाठी विज्ञानाचा वापर करण्यास प्रोत्साहन देणे आणि नवसंशोधकांचा समुदाय घडवणे ही या प्रदर्शनाची प्रमुख उद्दिष्टे आहेत. विभागस्तरीय स्पर्धेत प्रथम व द्वितीय क्रमांक मिळविणाऱ्या पथकांची राज्यस्तरीय स्पर्धेसाठी निवड करण्यात येणार असून ही स्पर्धा केवळ राज्यस्तरापर्यंत मर्यादित राहणार आहे, असेही श्री. लकडे यांनी प्रसिद्धी पत्रकांनव्ये कळविले आहे.
