प्रशांत दामले रंगभूमीचे निशाण टिकविणारा सेनापती-दिलीप प्रभावळकर

अखिल भारतीय मराठी नाट्य परिषद, कोथरूड शाखेच्या वर्धापन दिनी उपक्रम

marathinews24.com

पुणे – कलाकाराला प्रत्येक भूमिका, व्यक्तिरेखा अधिक शहाणी करते तसेच प्रत्येक पुरस्कार अधिक नम्र बनवतो. यशवंतराव चव्हाण नाट्यगृहात मी पहिल्यापासूनच अनेक नाट्यप्रयोग केले आहेत. येथे प्रत्येक प्रयोग रंगलेला आहे ही या वास्तूचीच किमया आहे, अशा भावना ज्येष्ठ अभिनेते दिलीप प्रभावळकर यांनी व्यक्त केल्या. प्रशांत व गौरी दामले यांना यशवंत-वेणू पुरस्काराने सन्मानित करताना मला अतिशय आनंद व समाधान वाटत आहे. आजच्या मालिकांच्या हल्ल्यातील भाऊगर्दीत रंगभूमीचे निशाण टिकविणारा सेनापती म्हणजे प्रशांत दामले होय. त्याचा रंगभूमीवरील वावर अतिशय चैतन्यमय व उर्जापूर्ण असतो. त्याची रंगभूमीवरील निष्ठा आणि स्वत:च्या कामात आनंद घेणे हे इतरांसाठी मार्गदर्शक आहे, अशा शब्दात दामले दाम्पत्याचा त्यांनी गौरव केला.

अनुसूचित जाती आयोगाचे सदस्य गोरक्ष लोखंडे यांनी घेतला विविध प्रकरणांचा आढावा – सविस्तर बातमी 

अखिल भारतीय मराठी नाट्य परिषद, कोथरूड शाखेचा वर्धापन दिन तसेच यशवंतराव चव्हाण नाट्यगृहाचा रौप्यमहोत्सवी वर्धापन दिन यानिमित्त आणि स्व. यशवंतराव चव्हाण यांच्या स्मृतिदिनाचे औचित्य साधून यशवंत-वेणू पुरस्काराने सुप्रसिद्ध अभिनेते प्रशांत दामले आणि गौरी प्रशांत दामले यांचा दिलीप प्रभावळकर यांच्या हस्ते गौरव करण्यात आला. यावेळी दिलीप प्रभावळकर बोलत होते. प्रभावळकर यांचा या वेळी जीवनगौरव पुरस्काराने सन्मान करण्यात आला. मानपत्र, दहा हजार रुपये, शाल, स्मृतीचिन्ह असे पुरस्काराचे स्वरूप होते. तर यशवंत-वेणू पुरस्काराचे स्वरूप १५ हजार रुपये, मानपत्र, शाल, स्मृतीचिन्ह असे होते. मानपत्राचे लिखाण आणि वाचन कवी वलय मुळगुंद यांनी केले.

यशवंतराव चव्हाण नाट्यगृहात मंगळवारी (दि. २५) कार्यक्रमाचे आयोजन करण्यात आले होते. माजी कृषीमंत्री शशिकांत सुतार, नाट्य परिषदेच्या कोथरूड शाखेचे अध्यक्ष सुनील महाजन, प्रमुख कार्यवाह सत्यजित धांडेकर, उपाध्यक्ष समीर हंपी, दीपक गुप्ते मंचावर होते. पुणे महापालिकेच्या सहकार्याने या कार्यक्रमाचे आयोजन करण्यात आले होते. कुटुंब किर्रतन (सर्वोत्कृष्ट नाटक), ठकीशी संवाद (सर्वोत्कृष्ट प्रायोगिक नाटक), दोन वाजून बावीस मिनिटांनी (विशेष लक्षवेधी नाटक) तसेच संदेश कुलकर्णी (सर्वोत्कृष्ट लेखक), विजय केंकरे (सर्वोत्कृष्ट दिग्दर्शक), संकर्षण कऱ्हाडे (सर्वोत्कृष्ट अभिनेता), शुभांगी गोखले (सर्वोत्कृष्ट अभिनेत्री), दत्ता शिंदे (पडद्यामागील कलाकार) यांचा या वेळी यशवंत सन्मानाने गौरव करण्यात आला.

गायन कलेला वाव द्यावा..

नाट्यक्षेत्रात पुढेही विक्रम करत प्रशांत दामले यांनी गायन कलेला अधिक न्याया द्यावा अशी अपेक्षा व्यक्त करून दिलीप प्रभावळकर पुढे म्हणाले, उत्तम अभिनयाबरोबरच गायन कलेची देणगी प्रशांत दामले यांना लाभलेली आहे. त्यामुळे स्वत:तील गायकाला न्याय देत त्यांनी आपली नाट्यक्षेत्रातील वाटचाल सुरू ठेवावी. गौरी दामले यांच्याविषयीचे किस्से त्यांनी सांगितले.

प्रशांत दामले म्हणाले, नाट्य क्षेत्राला वाहून घेण्यासाठी मला पत्नी गौरीची खंबीर साथ लाभली. ‘प्रशांत, प्रयोग करू नकोस’ असे तिने मला आजपर्यंत कधीही म्हटले नाही. मला अनेक पुरस्कार प्राप्त झाले आहेत परंतु पती-पत्नीच्या नावाने मला व गौरीला मिळालेला हा पहिलाच पुरस्कार आहे. नाटक, तालमी, प्रयोग, दौरे याविषयी माहिती असणारी पत्नी लाभली हे माझे सुदैव आहे. ते पुढे म्हणाले, दिलीप प्रभावळकर यांचे व्यक्तिमत्त्व माझ्यासाठी आदर्श व दीपस्तंभासारखे आहे. त्यांच्यातील कलाकाराला सतत प्रश्न पडतात हे कला सादरीकरणासाठी आवश्यक आहे. नाट्य क्षेत्रात वावरताना वातावरण हसते खेळते ठेवणे हे मी दिलीप भैय्यांकडूनच शिकलो आहे.

यशवंत सन्मानाने सन्मानित कलाकारांच्या वतीने संकर्षण कऱ्हाडे यांनी मनोगत व्यक्त केले. यशवंतराव चव्हाण नाट्यगृहाच्या निर्मितीमागील पट शशिकांत सुतार यांनी उलगडून दाखविला.

नाट्य संमेलन घेण्याची संधी मिळावी

स्वागतपर प्रास्ताविकात नाट्य परिषदेच्या कोथरूड शाखेला नाट्य संमेलन घेण्याची संधी मिळावी अशी विनंती सुनील महाजन यांनी या प्रसंगी केली. उपाध्यक्ष समीर हंमी यांनी मनोगत व्यक्त केले तर सत्यजित धांडेकर यांनी आभार मानले. कार्यक्रमाचे सूत्रसंचालन स्नेहल दामले यांनी केले. पुरस्कार वितरण सोहळ्यानिमित्त ‌‘धुंदी कळ्यांनो.. धुंदी फुलांनो’ हा सदाबहार गीतांचा कार्यक्रम अजित परब आणि मनिषा निश्चल यांनी सादर केला. निवेदन ओंकार दीक्षित यांचे होते.