दानपेटीतील रोकड चोरणारे तीन अल्पवयीन ताब्यात
marathinews24.com
पुणे – आद्य क्रांतीकारक राजे उमाजी नाईक यांच्या स्मारक परिसरातील दानपेटी फोडून रोकड चोरणाऱ्या तीन अल्पवयीनांना खडक पोलिसांनी ताब्यात घेतले. याबाबत पोलीस शिपाई कृष्णा गायकवाड यांनी खडक पोलीस ठाण्यात फिर्याद दिली आहे.
चारचाकीच्या धडकेने महिला गंभीर जखमी; चालक फरार – सविस्तर बातमी
पोलिसांनी दिलेल्या माहितीनुसार, छत्रपती शिवाजी महाराज रस्त्यावरील मामलेदार कचेरीच्या परिसरात क्रांतीकारी उमाजी नाईक यांचे स्मारक आहे. खडक पोलीस ठाण्याच्या आवारापासून काही अंतरावर हे स्मारक आहे. सोमवारी (२५ मे) पहाटे साडेचारच्या सुमारास स्मारकाच्या आवारातील दानपेटी उचकटून तीन अल्पवयीनांनी पाच हजार १६० रुपये चोरले. पोलिसांच्या लक्षात हा प्रकार आल्यानंतर तिघांना पोलिसांनी ताब्यात घेतले. पोलीस हवालदार केंगार तपास करत आहेत.
महिलेकडून १२ लाख ८० हजारांचा ऐवज लंपास
घरकामास ठेवलेल्या महिलेने सदनिकेतून १२ लाख ८० हजार रुपयांचे सोन्याचे दागिने चोरुन नेल्याची घटना खडकी भागाताील एका सोसायटीत घडली. याबाबत एका महिलेने खडकी पोलीस ठाण्यात फिर्याद दिली आहे. या प्रकरणी घरकाम करणाऱ्या एका ३२ वर्षीय महिलेविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार महिला खडकीतील रेंजहिल्स भागात असलेल्या एका सोसायटीत राहायला आहेत. आरोपी महिला त्यंच्याकडे घरकामास होती. तक्रारदार महिलेचे लक्ष नसल्याची संधी साधून तिने कपाटातील सोन्याचे दागिने आणि रोकड असा १२ लाख ८० हजार रुपयांचा ऐवज चाेरला. कपाटातील ऐवज चोरुन नेल्याचा प्रकार उघडकीस आल्यानंतर महिलेने पोलिसांकडे तक्रार दिली. घरकाम करणाऱ्या महिलेने दागिने चोरल्याचा संशय महिलेने फिर्यादीत व्यक्त केला आहे. पोलीस उपनिरीक्षक दिग्विजय चौगले तपास करत आहेत.
