पुण्यातील दांडेकर पुलावरील घटना
marathinews24.com
पुणे – जुन्या भांडणाच्या रागातून टोळक्याने अल्पवयीनावर वार करून त्याला गंभीररित्या जखमी केले आहे. ही घटना २ मार्चला संध्याकाळी साडेसातच्या सुमारास दांडेकर पुलाजवळ घडली आहे. याप्रकरणी १७ वर्षीय मुलाने पर्वती पोलीस ठाण्यात फिर्याद दाखल केली आहे. त्यानुसार टोळक्याविरूद्ध गुन्हा दाखल करीत तिघांना अटक केली आहे.
रेल्वेत नोकरीच्या बहाण्याने १६ जणांची फसवणूक – सविस्तर बातमी
आकाश महादेव सुर्यवंशी (वय २० रा. दांडेकर पुल) अथर्व नीलेश भालशंकर (वय १९, रा. दांडेकर पुल, सिंहगड रोड) आदेश सुरेश म्हस्के (वय १९ रा. दांडेकर पुल) अशी अटक केलेल्यांची नावे आहेत. त्यांचा एक साथीदार पसार झाला असून, पोलिसांकडून त्याचा शोध घेतला जात आहे.
पोलिसांनी दिलेल्या माहितीनुसार, तक्रारदार १७ वर्षीय मुलगा आणि आरोपींमध्ये काही दिवसांपुर्वी भांडण झाले होते. त्याच भांडणाचा राग आरोपींच्या मनात होता. त्यातून २ मार्चला आरोपींनी तक्रारदाराला दांडेकर पुल परिसरात गाठले. त्याला शिवीगाळ करून बेदम मारहाण केली. त्यानंतर त्याच्यावर धारदार शस्त्राने वार करून गंभीररित्या जखमी केले. हल्ल्यानंतर टोळके पसार झाले होते. याप्रकरणी पर्वती पोलिसांनी तिघांचा शोध घेत त्यांना अटक केली आहे. पोलीस उपनिरीक्षक इसराईल शेख तपास करीत आहेत.
