पुण्यात वेगवेगळ्या अपघातांत दोन महिलांसह तिघांचा मृत्यू

मगरपट्टा, अहिल्यानगर रस्ता, तसेच खराडी भागात अपघाताच्या घडल्या घटना

marathinews24.com

पुणे – शहरात वेगवेगळ्या अपघातांत दोन महिलांसह तिघांचा मृत्यू झाल्याची घटना घडली. हडपसरमधील मगरपट्टा, अहिल्यानगर रस्ता, तसेच खराडी भागात अपघाताच्या घटना घडल्या.

हातउसने पैशांच्या वादातून तरुणाचा खुनाचा प्रयत्न – सविस्तर बातमी

खराडी परिसरात भरधाव वाहनाच्या धडकेत दुचाकीस्वार महिलेचा मृत्यू झाल्याची घटना गुरुवारी (७ मे) सायंकाळी घडली. संगीता पांडुरंग कारभारी-पाटील (वय ३९, रा. निर्मल टाऊनशिप, ससाणेनगर, हडपसर) असे मृत्युमुखी पडलेल्या दुचाकीस्वार महिलेचे नाव आहे. या प्रकरणी वाहन चालकाविरुद्ध गुन्हा दाखल करण्यात आला आहे. याबाबत संगीता यांचे पती पांडुरंग (वय ४३) यांनी खराडी पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, दुचाकीस्वार संगीता या खराडी परिसरातून गुरुवारी सायंकाळी सातच्या सुमारास निघाल्या होत्या. त्या वेळी भरघाव वाहनाने त्यांना धडक दिली. अपघातात त्या गंभीर जखमी झाल्या. उपचारांपूर्वीच त्यांचा मृत्यू झाला होता. पोलीस उपनिरीक्षक सावन आवारे तपास करत आहेत.

पुणे-अहिल्यानगर रस्त्यावर लोणीकंद भागात ट्रकच्या धडकेत पादचारी ज्येष्ठ महिलेचा मृत्यू झाल्याची घटना शुक्रवारी (८ मे) सायंकाळी घडली. शांताबाई रघुनाथ जाधव (वय ७२) असे मृत्युमुखी पडलेल्या ज्येष्ठ महिलेचे नाव आहे. या प्रकरणी ट्रक चालकाविरुद्ध गुन्हा दाखल करण्यात आला आहे. याबाबत जाधव यांचे भाऊ किसन हनुमंता देवकर (वय ७७, रा. वरुड,ता. जिंती, जि. परभणी ) यांनी लाेणीकंद पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, देवकर यांची पत्नी आणि बहीण शांताबाई या शुक्रवारी सायंकाळी पाचच्या सुमारास अहिल्यानगर रस्त्याने निघाल्या होत्या. लोणीकंद भागात रस्ता ओलांडताना शांताबाई यांना ट्रकने धडक दिली. अपघातात त्यांचा मृत्यू झाला. सहायक पोलीस निरीक्षक वंजारी तपास करत आहेत.

हडपसर भागात तरुणाचा मृत्यू

हडपसरमधील मगरपट्टा भागात झालेल्या अपघातात दुचाकीस्वार तरुणाचा मृत्यू झाल्याची घटना नुकतीच घडली. जिशान अफसर शेख (वय १९, रा. सादाफ टाॅवर, लष्कर) असे मृत्युमुखी पडलेल्या दुचाकीस्वार तरुणाचे नाव आहे. याबाबत शेख अफसर बशीर मियाँ (वय ५४, रा. चिंचगव्हाण, ता. माजलगाव, जि. बीड) यांनी हडपसर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, गेल्या महिन्यात १७ एप्रिल रोजी दुचाकीस्वार जिशान हा रात्री साडेदहाच्या सुमारास मगरपट्टा परिसरातून निघाला होता. त्या वेळी भरधाव दुचाकी दुभाजकावर आदळली. दुचाकीस्वार जिशान फेकला गेला. समाेरून येणाऱ्या कंटेनरच्या चाकाखाली सापडून त्याचा मृत्यू झाला. सहायक पोलीस निरीक्षक साने तपास करत आहेत.