दोन पोलिसांना अटक, महिला शिपाई फरार
marathinews24.com
पुणे – बाल लैंगिक अत्याचार प्रकरणात (पोक्सो) गुन्हा दाखल करण्याची धमकी देऊन महाविद्यालयाच्या प्राचार्यांकडून खंडणी उकळणारा पोलीस उपनिरीक्षक अजित बडे, पोलीस कर्मचारी सुदाम तायडे यांना गुन्हे शाखेने अटक केली. या प्रकरणात महिला पोलीस शिपाई सोनाली हिंगे पसार झाली असून, तिचा शोध घेण्यात येत आहे.
आजारी आत्याला बघण्यासाठी जेलमधून पळाला – सविस्तर बातमी
नामवंत महाविद्यालयातील प्राचार्यांविरुद्ध बाल लौंगिक अत्याचार प्रकरणी गुन्हा दाखल करण्याची धमकी देऊन सात लाख रुपयांची खंडणी उकळल्याप्रकरणी बंडगार्डन पोलीस ठाण्यात उपनिरीक्षक बडे, तायडे, हिंगे यांच्याविरुद्ध गुन्हा दाखल करण्यात आला होता. पीडित युवतीची शिवाजीनगर पोलीस ठाण्याच्या दामिनी पथकातील पोलीस शिपाई हिंगे हिच्याशी एका व्यायामशाळेत (जीम) ओळख झाली होती. नामवंत महाविद्यालयात प्रवेश मिळवून देण्याचे आमिष तिने युवतीला दाखविले होते. त्यानंतर या युवतीला जाळ्यात ओढून बडे, हिंगे, तायडे यांनी महाविद्यालयाच्या प्राचार्यांना धमकावले होते. युवतीला त्यांनी महाविद्यालयात प्रवेश मिळवून दिला नाही. तिने महाविद्यालयात प्रवेश घेतला होता. मात्र, संबंधित महाविद्यालयातील प्रवेशही रद्द झाला होता. अखेर पीडित युवतीने याबाबतची तक्रार पोलीस आयुक्तांकडे केली. तिच्यासोबत तिचे कुटुंबीय होते. या घटनेची गंभीर दखल घेण्यात आली. या प्रकरणात पोलीस आयुक्त अमितेशकुमार यांनी तिघांना पोलीस दलातून बडतर्फ केले होते.
गुन्हा दाखल झाल्यानंतर तिघे जण पसार झाले हाेते. तिघांचा गुन्हे शाखेकडून शोध घेण्यात येत होता. गुन्हे शाखेच्या युनिट दोनने बडे आणि तायडे यांना शुक्रवारी अटक केली.
