सायबर गुन्हे शाखेने चोरट्यांना बेळगाव परिसरातून केली अटक
marathinews24.com
पुणे – दोन कोटींची फसवणूक प्रकरणात कर्नाटकातील सायबर चोरट्यांना सायबर गुन्हे शाखेने अटक केली. अजय रामविलास यादव (वय २२), सलमान गौस मोहियुद्दीन अजनाल (वय ३२, दोघे रा. कर्नाटक) अशी अटक करण्यात आलेल्यांची नावे आहेत. यादव आणि अजनाल यांनी एका नामांकित कंपनीच्या बोधचिन्हाचा वापर समाज माध्यमातील खात्यात केला होता. त्याद्वारे यादव आणि अजनाल हे कंपनी ग्राहकांशी संपर्क साधत होते. पैसे थकले असून, तातडीने पैसे जमा करा, असा संदेश ते पाठवित होते. संदेशबाबत खातरजमा न करता अनेकांनी आरोपींच्या खात्यात पैसे जमा केले. चोरट्यांच्या खात्यात १ कोटी ९५ लाख रुपये जमा करण्यात आली होती. या प्रकरणी सायबर पोलीस ठाण्यात माहिती-तंत्रज्ञान कायद्यान्वये गुन्हा दाखल करण्यात आला होता.
हडपसरमध्ये मजुरांच्या वसाहतीत आग – सविस्तर बातमी
तांत्रिक तपासात बँक खाते कर्नाटकातील बेळगाव भागातील एका बँकेतील असल्याची माहिती मिळाली. त्यानंतर सायबर पोलिसांच्या पथकाने दोघांना बेळगाव परिसरातून अटक केली. त्यांच्याकडून तीन मोबाइल संच, बँकेची खातेपुस्तिका, डेबिट कार्ड असा मुद्देमाल जप्त केला. आरोपींनी अशा पद्धतीने फसवणुकीचे आणखी काही गुन्हे केल्याची शक्यता पोलिसांनी व्यक्त केली आहे. नागरिकांनी समाज माध्यमातून पाठविण्यात येणाऱ्या संदेशाबाबत खातरजमा करुन व्यवहार करावेत. काही संशयास्पद आढळून आल्यास त्वरीत सायबर पोलिसांशी संपर्क साधावा, असे आवाहन करण्यत आले आहे.
अतिरिक्त पोलीस आयुक्त पंकज देशमुख, आर्थिक आणि सायबर गुन्हे शाखेचे पोलीस उपायुक्त विवेक मासाळ यांच्या मार्गदर्शनाखाली वरिष्ठ पोलीस निरीक्षक स्वप्नाली शिंदे, पोलीस निरीक्षक संगीता देवकाते, उपनिरीक्षक सुशील डमरे, संदीप कणसे, प्रवीणसिंग राजपूत, राजूदास चव्हाण, अमर बनसोडे, शीतल डांगरे, अनिकेत भिंगारे यांनी ही कामगिरी केली.
