धनकवडीतील घटना
marathinews24.com
पुणे – जुन्या भांडणाच्या रागातून टोळक्याने दोघांवर खुनी हल्ला केल्याची घटना ३ मार्चला रात्री साडेआठच्या सुमारास धनकवडीतील शंकर महाराज मठासमोरील पुलाजवळ घडली आहे. याप्रकरणी सहकारनगर पोलिसांनी चौघांना अटक केली असून, इतर आरोपींचा शोध घेतला जात आहे. अनिल मारूती साळुंखे (वय ३५) दीनेश अरूण शेंडगे (वय ४६) नीलेश अरूण शेंडगे (वय ३८) आणि यश उर्फ बाल्या दीनेश शेंडगे (वय १९ सर्व रा. धनकवडी) अशी अटक केलेल्यांची नावे आहेत.याप्रकरणी ४३ वर्षीय नागरिकाने सहकानगर पोलीस ठाण्यात फिर्याद दाखल केली आहे.
भांडणात मध्यस्थी करणार्याला केली मारहाण – सविस्तर बातमी
पोलिसांनी दिलेल्या माहितीनुसार, तक्रारदार हे धनकवडीत राहायला असून, त्यांची काही दिवसांपुर्वी आरोपींसोबत भांडणे झाली होती. त्याच रागातून टोळक्याने ३ मार्चला फिर्यादीसह त्यांच्या मित्राला शंकर महाराज मठाजवळ गाठले. त्याठिकाणी त्यांच्यावर लोखंडी रॉडसह, बांबू, फरशीच्या तुकड्याने खुनी हल्ला केला. हल्ल्यात दोघेही गंभीररित्या जखमी झाले. त्यानंतर टोळके पसार झाले होते. याप्रकरणी चौघांना अटक करण्यात आली असून, इतरांचा शोध घेतला जात आहे. पोलीस उपनिरीक्षक स्वप्नील लोहार तपास करीत आहेत.
