धनकवडीतील आंबेगाव पठार भागातील घटना
marathinews24.com
पुणे – बेकायदा बाळगलेल्या देशी बनावटीच्या पिस्तुलातून गोळीबार झाल्यानंतर एक तरुण जखमी झाल्याची घटना धनकवडीतील आंबेगाव पठार भागात घडली. या प्रकरणी भारती विद्यापीठ पोलिसांनी एकाला अटक करण्यात आली असून, साथीदाराविरुद्ध गुन्हा दाखल करण्यात आला. संकेत गोरक्ष चोरघे (रा. कोलवडी, ता. वेल्हे, जि. पुणे) असे जखमी झालेल्याचे नाव आहे. या प्रकरणी अविनाश मोरे (रा. धनकवडी) याला अटक करण्यात आली असून, साथीदार सनी उर्फ संदीप सुभाष दीपक (वय ३०, रा. फाईव्ह स्टार सोसायटी, धनकवडी) याच्याविरुद्ध गुन्हा दाखल करण्यात आला आहे. याबाबत पोलीस उपनिरीक्षक नीलेश मोकाशी यांनी भारती विद्यापीठ पोलीस ठाण्यात फिर्याद दिली आहे.
कर्वेनगर परिसरात जेष्ठ महिलेचे मंगळसूत्र हिसकावले – सविस्तर बातमी
पोलिसांनी दिलेल्या माहितीनुसार, चोरघे हा सराईत आहे. त्याने देशी बनावटीचे बेकायदा पिस्तूल बाळगले होते. हे पिस्तूल त्याने चोरघेकडून घेतले होते. मंगळवारी (१ सप्टेंबर) मध्यरात्री साडेबाराच्या सुमारास धनकवडीतील आंबेगाव पठार येथील साईसिद्धी चौकात चोरघे, मोरे, दीपक हे थांबले होते. दीपक याचा भाजीपाला विक्रीचा व्यवसाय आहे. चोरघे याच्याकडे पिस्तूल असल्याची माहिती दीपक याला होती. त्याने याबाबतची माहिती पोलिसांना दिली नव्हती. आरोपी दीपक हा पिस्तूल हाताळत होता. पिस्तूल हाताळताना अचानक चाप ओढला गेला. पिस्तुलातून सुटलेली गोळी चोरघे जखमी झाला. या घटनेची माहिती मिळताच पोलीस आयुक्त मिलिंद मोहिते, सहायक आयुक्त राहुल आवारे, वरिष्ठ पोलीस निरीक्षक सुदर्शन गायकवाड यांनी घटनास्थळी भेट दिली. या प्रकरणी एकाला अटक करण्यात आली असून, गोळीबारात जखमी झालेला चोरघे याच्यावर रुग्णालयात उपचार सुरू आहेत. सहायक पोलीस निरीक्षक पवार तपास करत आहेत.
