५ जण अटकेत
marathinews24.com
पुणे – विवाह समारंभातील मेंहदीच्या कार्यक्रमात टोळक्याने एकाला शस्त्राचा धाक दाखवून पाच लाखांची सोनसाखळी हिसकावून नेल्याची घटना येरवडा भागात घडली. या प्रकरणी लक्ष्मीनगर पोलिसांनी पाच जणांविरुद्ध दरोड्याचा गु्न्हा दाखल करुन त्यांना अटक केली. संतोष काची, यश काची (रा. ममतानगर, सांगवी, पिंपरी-चिंचवड), दत्ता रघुनाथ चव्हाण (रा. वारजे), सुशील सूर्यकांत गौड (रा. पाटील इस्टेट, जुना मुंबई-पुणे रस्ता), यश दीपक सावंत (रा. जुनी सांगवी, पिंपरी-चिंचवड) अशी अटक करण्यात आलेल्यांची नावे आहेत. याबाबत नंदू अर्जुन काची (वय ५३, रा. संजयनगर, फुगेवाडी, पिंपरी-चिंचवड) यांनी लक्ष्मीनगर पोलीस ठाण्यात फिर्याद दिली आहे.
काय सांगता…बंगल्यात केली गांजाची लागवड – सविस्तर बातमी
पोलिसांनी दिलेल्या माहितीनुसार, येरवड्यातील संगमवाडी परिसरात सुनीता काची यांच्या घरी २७ एप्रिल रोजी रात्री दहाच्या सुमारास मेंहदीचा कार्यक्रम सुरू होता. आरोपी आणि फिर्यादी हे ओळखीचे आहेत. आरोपींनी त्यांना कार्यक्रमात शिवीगाळ करुन शस्त्राचा धाक दाखविला. त्यांच्या गळ्यातील पाच लाख रुपयांची सोनसाखळी हिसकावून नेली. त्यांना मारहाण करुन आरोपी पसार झाले. घाबरलेल्या काची यांनी पोलिसांकडे तक्रार दिली. त्यानंतर पोलिसांनी तातडीने तपास करुन पसार आरोपींना अटक केली. सहायक पोलीस निरीक्षक मिथून सावंत तपास करत आहेत.
दुकानातून १ लाख ४० हजारांची रोकड चोरी
शहरातील दुकानांचे कुलूप तोडून गल्ल्यातील रोकड चोरी करण्याच्या घटना वाढल्या आहेत. हडपसर परिसरातील एका दुकानाचे कुलूप तोडून चोरट्यांनी गल्ल्यातील एक लाख ४० हजारांची रोकड चोरून नेल्याची घटना उघडकीस आली.
याबाबत संदीप रामदास नाळे (रा. कामठे वस्ती, फुरसुंगी, हडपसर-सासवड रस्ता) यांनी हडपसर पोलीस ठाण्यात फिर्याद दिली आहे. त्यंनी दिलेल्या फिर्यादीनुसार चोरट्यांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, नाळे यांचे हडपसरमधील गोंधळेनगर परिसरात गोल्डन बॅटरी हे दुकान आहे. मंगळवारी (२८ एप्रिल) मध्यरात्री चोरट्यांनी दुकानाचे कुलूप तोडले. गल्ल्यातील एक लाख ४० हजारांची रोकड चोरून चोरटे पसार झाले. मंगळवारी सकाळी दुकानाचे कुलूप तुटल्याचे फिर्यादीच्या लक्षात आले. त्यानंतर पोलिसांना या घटनेची माहिती कळविण्यात आली. पोलिसांनी घटनास्थळी भेट दिली. पसार झालेल्या चाेरट्यांच्या शोध घेण्यात येत असून, पोलीस उपनिरीक्षक कोलेवाड तपास करत आहेत.
