सिंहगड रोड परिसरातील स्वामीनारायण मंदिराजवळ घडली घटना
marathinews24.com
पुणे – धावत्या चारचाकी गाडीला अचानक आग लागल्याने गाडी पूर्णतः जळून खाक झाली आहे. सुदैवाने गाडीत कोणीही न अडकल्याने मोठी दुर्घटना टळली आहे. ही घटना रविवारी (दि. ३ ) रात्री पावणे आठच्या सुमारास सिंहगड रोड परिसरातील स्वामीनारायण मंदिरासमोर घडली आहे. आगीमुळे काही काळ परिसरात भीतीचे वातावरण निर्माण झाले.
अत्याचार प्रकरणाच्या तपासासासाठी विशेष तपास पथक – सविस्तर बातमी
अग्निशमक दलाच्या जवानांनी दिलेल्या माहितीनुसार, शिवाजी सोपान तोडकर (वय ५२, रा. आनंद नगर, सिंहगड रोड, पुणे) हे आपल्या दोन मित्रांसह पाचगणीहून पुण्याकडे येत होते. स्वामीनारायण मंदिराजवळ पोहोचताच गाडीच्या इंजिनने अचानक पेट घेतला. प्रसंगावधान राखत चालक व इतर प्रवासी तात्काळ गाडीतून खाली उतरले. त्यानंतर काही क्षणातच संपूर्ण गाडीने पेट घेतल्याने वाहन आगीच्या भक्ष्यस्थानी सापडले. घटनेची माहिती मिळताच नऱ्हे पोलीस मार्शल, पोलीस निरीक्षक, डीबी पथक, तसेच नरे चौकी अधिकारी व कर्मचारी घटनास्थळी दाखल झाले.
अग्निशमन दलाला पाचारण करण्यात आले असून त्यांनी तत्काळ आग आटोक्यात आणली. आग विझवल्यानंतर जळालेली गाडी क्रेनच्या साहाय्याने बाजूला हटवण्यात आली. हायवेवरील वाहतूक पुन्हा सुरळीत करण्यात आली. घटनेत कोणतीही जीवितहानी झाली नाही. मात्र, गाडी पूर्णपणे जळून खाक झाल्याने मोठे आर्थिक नुकसान झाले आहे. या घटनेमुळे वाहन चालकांमध्ये काही काळ भीतीचे वातावरण निर्माण झाले होते.
