गणेश पेठेतील दुकानदाराला अटक
marathinews24.com
पुणे – शहरासह जिल्ह्यातील मुलींवरील अत्याचाराच्या घटना थांबत नसल्याचे विविध घटनांवरून स्पष्ट झाले आहे. नसरापूरात चिमुरडीवर अत्याचारानंतर खून, पर्वती पायथ्याजवळ आजोबाने नातीवर केलेला अत्याचाराचा प्रयत्न, थेउरमध्ये घराशेजारी राहणार्याने चिमुरडीचा केलेला विनयभंग, राजाराम पुलावर तरूणीच्या विनयभंगाची घटना ताजी आहे. असे असतानाच गणेश पेठेतील ४७ वर्षीय दुकानदाराने १० वर्षीय मुलीला चॉकलेटचे आमिष दाखवून अत्याचाराचा प्रयत्न केला. ही घटना गुरूवारी (दि.७) संध्याकाळी साडेचार वाजण्याच्या सुमारास घडली. मुलीने आरडाओरड करीत सुटका करून घेत कुटूंबियांना माहिती दिल्यामुळे अनर्थ टळला आहे. याप्रकरणी आरोपीविरूद्ध पोक्सोनुसार फरासखाना पोलीस ठाण्यात गुन्हा दाखल केला आहे.
पीएमपीलचे अध्यक्ष महेश आव्हाड यांच्या कारचा भीषण अपघात – सविस्तर बातमी
पोलिसांनी दिलेल्या माहितीनुसार, पीडित मुलगी गुरूवारी संध्याकाळी सव्वा चार वाजता गणेश पेठेतील दुधभट्टी परिसरात थांबली होती. त्यावेळी परिसरातील दुकानदाराने मुलीला चॉकलेट देतो, असे आमिष दाखवून बोलावून घेतले. त्यानंतर त्याने मुलीवर लैंगिक अत्याचाराचा प्रयत्न केला. मात्र, मुलीने आरडाओरड करीत स्वतःची सुटका करीत पळ काढला. या घटनेची माहिती तिने आजीला दिली. त्यानंतर कुटूंबियाने फरासखाना पोलीस ठाण्यात धाव घेत तक्रार दिली. याप्रकरणी पोलिसांनी तातडीने आरोपीविरूद्ध पोक्सोनुसार गुन्हा दाखल करीत त्याला अटक केली आहे.
दुकानदाराने मुलीला चॉकलेटचे आमिष दाखवून तिच्यावर अत्याचाराचा प्रयत्न केला. मात्र, मुलीने आरडाओरड करीत सुटका करून घेत घटनेची आजीला माहिती दिली. याप्रकरणी गुन्हा दाखल होताच आरोपीला अटक करण्यात आली असून, सर्वजण सुरक्षित आहे. कृषीकेश रावले, पोलीस उपायुक्त, परिमंडळ एक
