अज्ञात चारचाकी चालकाविरुद्ध गुन्हा दाखल
marathinews24.com
पुणे – जिल्ह्यातील तुळापूर-मरकळ रस्त्यावर भरधाव वेगातील चारचाकी वाहनाने पायी चालणाऱ्या महिलेेला जोरदार धडक दिल्याची घटना घडली आहे. या अपघातात महिलेच्या डोक्याला गंभीर दुखापत झाली असून दोन्ही पाय, खांदा आणि हाताची बोटे फ्रॅक्चर झाली आहेत. अपघातानंतर जखमी महिलेला मदत न करता चालक वाहनासह फरार झाल्याने संताप व्यक्त होत आहे. सोमेश पंकज कडूसकर (वय २८, व्यवसाय सिक्युरिटी गार्ड, सध्या रा. मरकळ, खेड, मूळ रा. सावेडी प्रेमदान हडको, अहिल्यानगर) यांनी लोणीकंद पोलिस ठाण्यात तक्रार दिली आहे. त्यानुसार अज्ञात चारचाकी चालकाविरुद्ध गुन्हा दाखल करण्यात आला आहे.
दिवसाढवळ्या डोळ्यात स्प्रे मारून २६ लाखांची रोकड पळवली – सविस्तर बातमी
पोलिसांनी दिलेल्या माहितीनुसार, तुळापूर-मरकळ रोडवरील श्रेयश वॉशिंग सेंटरजवळ जयवंतनगर परिसरात २३ मे रोजी पहाटे साडेपाचच्या सुमारास ही घटना घडली. तक्रारदार यांची आई रस्त्याच्या कडेला पायी चालत असताना अज्ञात चालकाने भरधाव वेगात आणि निष्काळजीपणे वाहन चालवत त्यांना समोरून धडक दिली. अपघातात महिलेच्या डोक्याला गंभीर मार बसला असून दोन्ही पायांना गुडघ्याजवळ फ्रॅक्चर झाले आहे. तसेच डावा खांदा, हाताची बोटे आणि शरीराच्या विविध भागांना गंभीर दुखापत झाली आहे. अपघातानंतर चालकाने जखमी महिलेला कोणतीही वैद्यकीय मदत न करता घटनास्थळावरून पळ काढला. तक्रारदार यांच्या आईवर उपचार झाल्यानंतर तक्रार नोंदवण्यात आली आहे. या प्रकरणी लोणीकंद पोलिस ठाण्यात भारतीय न्याय संहितेसह मोटार वाहन कायद्यान्वये गुन्हा दाखल केला असून फरार चालकाचा शोध सुरू आहे.
