चोरट्यांविरुद्ध गुन्हा दाखल
marathinews24.com
पुणे – इलेक्ट्रीक साहित्याची विक्री करणाऱ्या दुकानाचा दरवाजा उचकटून चोरट्यांनी वायरीचे बंडल, गल्ल्यातील रोकड असा दोन पाच हजार रुपयांचा मुद्देमाल चोरुन नेल्याची घटना वाघोली परिसरात घडली. याप्रकरणी चोरट्यांविरुद्ध गुन्हा दाखल करण्यात आला आहे. याबाबत इलेक्ट्रीक साहित्य विक्रेत्याने वाघोली पोलीस ठाण्यात फिर्याद दिली आहे.
आद्य क्रांतीकारक उमाजी नाईक स्मारकात चोरी – सविस्तर बातमी
पोलिसांनी दिलेल्या माहितीनुसार, वाघोलीतील डोमखेल रस्त्यावर तक्रारदाराचे गणेशाय हे इलेक्ट्रीक साहित्य विक्रीचे दुकान आहे. चोरट्यांनी २५ मे रोजी मध्यरात्री दुकानाचा दरवाजा उचकटला. दुकानात ठेवलेले इलेक्ट्रीक वायरचे २५ बंडल आणि गल्ल्यातील पाच हजारांची रोकड असा मुद्देमाल चोरुन नेला. चोरलेल्या वायरच्या बंडलची किंमत दोन लाख रुपये आहे. पोलीस उपनिरीक्षक मनोज बागल तपास करत आहेत.
बिबवेवाडीत तरुणाला लुटले
बिबवेवाडी परिसरात ऑनलाइन खाद्यपदार्थ घरपोच पोहचविणाऱ्या एका तरुणाला धमकावून लुटण्यात आल्याची घटना घडली. याबाबत एका तरुणाने बिबवेवाडी पोलीस ठाण्यात फिर्याद दिली आहे. त्यानुसार दोन चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार तरुण ‘डिलिव्हरी बाॅय’ म्हणून काम करतो. २४ मे रोजी मध्यरात्री साडेबाराच्या सुमारास तरुण बिबवेवाडी परिसरातून निघाला होता. त्या वेळी दोघांनी त्याला अडवून शिवीगाळ केली. तरुणाला मारहाण करुन त्याच्याकडील पार्सल, कानातील सोन्याची बाळी, मोबाइल संच असा मुद्देमाल हिसकावून नेला. सहायक पोलीस फौजदार एस. डी. गायकवाड तपास करत आहेत. शहर परिसरात गेल्या काही महिन्यांपासून नागरिकांना लुटण्याच्या घटना वाढल्या आहेत. नागरिकांकडील मोबाइल संच हिसकावणे, तसेच पादचारी महिलांकडील दागिने हिसकावून नेण्याच्या घटना वाढल्या आहेत. दोन दिवसांपूर्वी धनकवडीत एकाला धमकावून २५ लाखांची रोकड लुटण्यात आल्याची घटना घडली होती.
