चालकाविरूद्ध मांजरी पोलिसांनी केला गुन्हा दाखल
marathinews24.com
पुणे – भरधाव कंटेनर चालकाने दिलेल्या धडकेत पादचारी ठार झाल्याची घटना २५ ऑगस्टला संध्याकाळी साडेसहाच्या सुमारास मांजरी ते फुरसुंगी रस्त्यावरील जय मल्हार हॉटेलजवळ घडली आहे. याप्रकरणी कंटेनर चालकाविरूद्ध मांजरी पोलिसांनी गुन्हा दाखल केला आहे. रतन सदाशिव हरिहर (वय ५० रा. महादेवनगर, मांजरी बुद्रूक) असे ठार झालेल्याचे नाव आहे. अरुण झा (वय ४० रा. बिहार याच्याविरूद्ध गुन्हा दाखल केला आहे. सागर हरिहर (वय ३८ रा. मांजरी यांनी मांजरी पोलीस ठाण्यात फिर्याद दाखल केली आहे.
दारूच्या नशेत मांसाहारी जेवणाच्या वादातून मुलाचा खून – सविस्तर बातमी
पोलिसांनी दिलेल्या माहितीनुसार, रतन हरिहर हे मांजरी परिसरात राहायला होते. २५ ऑगस्टला ते रस्त्याने पायी जात असताना कंटेनरचालक अरुण झा याने त्यांना धडक दिली. त्यामुळे रतन हे गंभीररित्या जखमी झाले. उपचारासाठी त्यांना रुग्णालयात दाखल करण्यात आले. मात्र, उपचारादरम्यान त्यांचा मृत्यू झाल्याचे डॉक्टरांनी घोषित केले. दरम्यान, अपघातानंतर कंटेनर चालक अरुण झा हा घटनास्थळावरुन पसार झाला. पोलीस उपनिरीक्षक प्रियंका चव्हाण तपास करीत आहेत.
सायबर चोरट्याने जेष्ठाला घातला २२ लाखांचा गंडा
मोफत पेन्शन कार्ड मिळत असल्याची बतावणी करीत सायबर चोरट्याने जेष्ठ नागरिकाला तब्बल २२ लाखांचा ऑनलाईन गंडा घातला आहे. व्हॉट्सअॅप कॉल करीत आयसीआयसीआय बँक लोगो वापरुन त्यांची फसवणूक करण्यात आली आहे. ही घटना १८ ऑगस्टला कसबा पेठेतील पवळे चौकात घडली आहे. याप्रकरणी ८१ वर्षीय नागरिकाने फरासखाना पोलीस ठाण्यात फिर्याद दाखल केली आहे.
पोलिसांनी दिलेल्या माहितीनुसार, तक्रारदार हे जेष्ठ नागरिक असून, कसबा पेठेत राहायला आहेत. १८ ऑगस्टला सायबर चोरट्याने त्यांना व्हॉट्सअॅप कॉल केला. त्यासाठी चोरट्याने आयसीआयसीआय बँक लोगो वापरुन तक्रारदाराला मोफत पेन्शन कार्ड मिळत असल्याचे सांगितले. त्यानंतर त्यांना व्हिडिओ कॉल करुन मोबाइलमधील संबंधित अॅप उघडण्यास भाग पाडले. विविध ठिकाणी क्लिक करण्यास सांगून त्यांच्या बँक खात्यातील २२ लाख रुपये ऑनलाईनरित्या वर्ग करून घेतले. फसवणूक झाल्याचे लक्षात आल्यानंतर जेष्ठाने पोलीस ठाण्यात धाव घेतली. याप्रकरणी पोलीस निरीक्षक राजेश महाला तपास करीत आहेत.
