स्थानिक गुन्हे शाखेच्या पथकाने आरोपीला घेतले ताब्यात
marathinews24.com
बीड (अनंत जाधव) – जिल्हातील माजलगाव तालुक्यातील तालखेड येथे झालेल्या खून प्रकरणाचा अवघ्या १२ तासात तपास करत स्थानिक गुन्हे शाखेने आरोपीला ताब्यात घेतले आहे. विकास दत्तात्रय वाघमोडे (वय ३३) यांचा मृतदेह २९ जूनला त्यांच्या शेताजवळ आढळून आला होता. याप्रकरणी माजलगाव ग्रामीण पोलीस ठाण्यात भारतीय न्याय संहितेच्या कलम १०३(१) अंतर्गत अज्ञात आरोपीविरुद्ध खुनाचा गुन्हा दाखल केला होता. गुन्ह्याचा समांतर तपास स्थानिक गुन्हे शाखेकडून सुरू असताना पोलीस उपनिरीक्षक महेश विघ्ने यांच्या पथकाला तपासादरम्यान महत्त्वाचे धागेदोरे मिळाले.
पुण्यात कॅफेतील गैरवर्तन भोवले; पोलीस उपनिरीक्षक निलंबित – सविस्तर बातमी
आदित्य बारवाळ याच्यासोबत मयत विकास वाघमोडे यांचे काही दिवसांपूर्वी गंभीर वाद झाले होते. तसेच दोघांमध्ये मारामारी होऊन एकमेकांना जीवे मारण्याच्या धमक्याही देण्यात आल्या होत्या. या माहितीच्या आधारे पोलिसांनी आदित्य बारवाळ याला ताब्यात घेऊन कसून चौकशी केली. चौकशीत त्याने गुन्ह्याची कबुली देत, जुन्या वादाच्या रागातून २८ जूनला रात्री विकासचा पाठलाग करून शेताकडे जाणाऱ्या रस्त्यावर चाकूने पोटावर दोन आणि गळ्यावर एक वार करून खून केल्याची माहिती दिली. कबुली जबाबानंतर आरोपीला पुढील कारवाईसाठी माजलगाव ग्रामीण पोलिसांच्या ताब्यात देण्यात आले आहे.
ही कारवाई पोलीस अधीक्षक नवनीत काँवत, पोलीस अधीक्षक नवनीत कॉवत, अप्पर पोलीस अधीक्षक चेतना तिडके, पोलीस उपअधीक्षक ऋषीकेश शिंदे यांच्या मार्गदर्शनाखाली स्थानिक गुन्हे शाखेचे पोलीस निरीक्षक शिवाजी बंटेवाड, पोलीस उपनिरीक्षक महेश विघ्ने तसेच बप्पासाहेब घोडके, महेश जोगदंड, जफर पठाण, दिलीप गित्ते आणि गणेश मराडे यांच्या पथकाने केली आहे.
पोलीसांचे कौतुक
तालखेड येथे झालेल्या खून प्रकरणाचा अवघ्या १२ बारा तासांत स्थानिक गुन्हे शाखेच्या पथकाने उलगडा लावत या प्रकरणातील अरोपीला अटक करण्यास यश प्राप्त झाल्यामुळे जिल्हाभरातून बीड पोलीसांचे सर्वत्र कौतूक होत आहे.
