कात्रज, हडपसर, लोहगाव भागात घरफोडी
marathinews24.com
पुणे – शहराच्या वेगवेगळ्या भागात चोरट्यांनी सदनिकेचे कुलूप तोडून दागिने, रोकड असा ३ लाख ३५ हजार रुपयांचा ऐवज लांबविला. कात्रज, हडपसर, लोहगाव भागात घरफोडीच्या घटना घडल्या.
टेम्पोवर दुचाकी आदळून तरुणाचा मृत्यू – सविस्तर बातमी
कात्रजमधील सुखसागरनगर भागात एका सोसायटीतील सदनिकेचे कुलूप तोडून चोरट्यांनी दीड लाख रुपयांचे सोन्याचे दागिने लांबविल्याची घटना घडली. याबाबत एकाने भारती विद्यापीठ पोलीस ठाण्यात फिर्याद दिली आहे. या प्रकरणी चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार हे सुखसागरमधील सदगुरु अपार्टमेंटमध्ये राहाला आहेत. चोरट्यांनी सदनिकेचे कुलूप तोडून कपाटातील दागिने लांबविल्याची घटना नुकतीच घडली. सहायक पोलीस निरीक्षक पाटील तपास करत आहेत. तर हडपसरमधील काळेपडळ परिसरात सदनिकेचे कुलूप तोडून चोरट्यांनी १ लाख ८२ हजार रुपयांचे दागिने लांबविल्याची घटना रविवारी (२८ जून) घडली. याबाबत एकाने काळेपडळ पोलीस ठाण्यात फिर्याद दिली आहे. तक्रारदार हे वैष्णवीनगर येथे राहायला आहेत. चोरट्यांनी रविवारी दुपारी सदनिकेचे कुलूप तोडून ऐवज लांबविल्याची घटना घडली. रात्री घरफोडीचा प्रकार उघडकीस आल्यानंतर त्यांनी पोलिसांकडे तक्रार दिली. गुन्हे शाखेचे पोलीस निरीक्षक बाबर तपास करत आहेत.
लोहगावमधील निरगुडी रस्त्यावर असलेल्या मैत्री पार्क सोसायटीतील सदनिकेचे कुलूप तोडून चोरट्यांनी १५ हजार रुपयांचे सोन्याचे दागिने चोरुन नेल्याची घटना घडली. याबाबत एकाने लोहगाव पोलीस ठाण्यात फिर्याद दिली आहे. पोलीस हवालदार गायकवाड तपास करत आहेत.
