रुग्णालयाबाहेर माजवली दहशत
marathinews24.com
पुणे – शहरातील येरवडा भागात एकाने ७५ वर्षीय डाॅक्टरला धमकावून ५० हजार रुपयांची खंडणी मागितल्याचा प्रकार उघडकीस आला. आरोपीने तीक्ष्ण शस्त्र उगाररुन रुग्णालयाच्या परिसरात दहशत माजविली. याप्रकरणी अमोल पिल्ले (वय ४५, रा. जयजवाननगर, येरवडा) याच्याविरुद्ध गुन्हा दाखल करण्यात आला आहे. याबाबत डाॅक्टरांनी लक्ष्मीनगर पोलीस ठाण्यात फिर्याद दिली आहे.
विवाहाच्या आमिषाने तरुणीवर बलात्कार; आरोपी अटकेत – सविस्तर बातमी
पोलिसांनी दिलेल्या माहितीनुसार, तक्रारदार ७५ वर्षीय डाॅक्टरांचा येरवड्यातील जयजवाननगर भागात खासगी दवाखाना आहे. ते येरवडा भागातील महाराष्ट्र हौसिंग बोर्ड परिसरात राहायला आहेत. आरोपी ८ जुलै रोजी रात्री साडेनऊच्या सुमारास रुग्णालयात आला. त्याने डाॅक्टरांना तीक्ष्ण शस्त्राचा धाक दाखविला. त्यांच्याकडे ५० हजार रुपयांची खंडणी मागितली. खंडणी न दिल्यास जीवे मारण्याची धमकी दिली, असे डाॅक्टरांनी दिलेल्या फिर्यादीत म्हटले आहे.
खंडणीसाठी डाॅक्टरांना धमकाविण्यात आल्यानंतर आरोपी रुग्णालयातून बाहेर पडला. त्याने रस्त्यावर येऊन शिवीगाळ करण्यास सुरुवात केली. आरोपीने शस्त्र उगारून रस्त्यावर दहशत माजविली. घटनेची माहिती मिळताच वरिष्ठ पोलीस निरीक्षक रवींद्र कदम यांनी घटनास्थळी धाव घेतली. आरोपीविरुद्ध खंडणी मागणे, बेकायदा शस्त्र बाळगणे, तसेच महाराष्ट्र पोलीस कायद्यान्वये गुन्हा दाखल केला असून, पसार झालेल्या आरोपीचा शोध घेण्यात येत आहे. पोलीस उपनिरीक्षक सुरवसे तपास करत आहेत. दरम्यान, डोबिंवलीतील शिवसेनेचे (शिंदे गट) पक्षाचे नगरसेवक रमेश म्हात्रे यांनी महिला डाॅक्टरला मारहाण केल्याची घटना नुकतीच घडली होती.
