पोलीसांच्या आश्वासनानंतर ७ तासाने आंदोलन मागे
marathinews24.com
बीड (अनंत जाधव) – केज तालुक्यातील टाकळी येथील विलास घुले यांच्या खून प्रकरणात नवनवीन घडामोडी घडत आहे. न्याय मिळावा यासाठी घुले कुटुंबियांनी चक्क पाण्याच्या टाकीवर चढून बुधवारी (दि.१ ) शोले स्टाईल आंदोलन केले. तब्बल सात तास आंदोलन केल्यानंतर पोलिसांनी मागण्या पूर्ण करण्याचे आश्वासन दिले. त्यानंतर टाकीवर असलेले घुले कुटूंबीय खाली उतरले.
धक्कादायक…पेरणीसाठी पैसे नसल्याने शेतकऱ्याने घेतला गळफास – सविस्तर बातमी
न्यायाच्या मागण्यासाठी घुले कुटुंबियांनी बुधवारी सकाळी १० वाजता गावातील पाण्याच्या टाकीवर चढून शोले स्टाईल आंदोलन सुरू केले. आंदोलनात विलास घुले यांचे बंधू रमेश घुले,आई, पत्नी सहभागी झाले होते. घुले कुटुंबीयांनी पाच मागण्यासाठी तब्बल ७ तास आंदोलन केले. प्रकरणातील कटात सहभागी असलेल्या आरोपी सौरभ बजरंग सोनवणे यास तात्काळ अटक करण्यात यावी. सर्व आरोपीवर मोक्का अंतर्गत तात्काळ कार्यवाही करण्यात यावी. अर्जदाराची व त्यांच्या कुटुंबाची सोशल मीडियावर होत असलेली बदनामी करणाऱ्यांवर तात्काळ कार्यवाही करावी. खासदार बजरंग सोनवणे हे टी. व्ही. चॅनलच्या बाईटमध्ये अर्जदारास धमकीवजा बोलत आहेत; कदमवाडी येथील व सोनीजवळा येथील महिलांना माझे पाठबळ आहे असे सांगत आहेत.
त्यावरून त्यांचाही प्रकरणात असलेला सहभागाचा तपास करून तात्काळ कार्यवाही करण्यात यावी. कदमवाडी येथील राजश्री कदम नावाची महिला युट्यूब चॅनल व अन्य टी. व्ही चॅनल वर अर्जदाराा विषयी बदनामीकारक व खोटे आरोप करत आहे त्याच्यावर तात्काळ कार्यवाही करण्यात यावी. अशा मागण्या करण्यात आल्या आहेत. हे आंदोलन तब्बल सात तासानंतर सायंकाळी साडेपाच वाजता घुले कुटुंबियांकडून स्थगित करण्यात आले. घुले कुटुंबीयांनी केलेल्या मागणीवर पोलीस प्रशासनाने कारवाईचे आश्वासन दिले आहे.
