धमकी दिल्या प्रकरणी अदखलपात्र गुन्हा दाखल
marathinews24.com
पुणे – बांधकामाच्या वादातून नगरसेवक बाबूराव चांदेरे यांनी बाणेर पोलिस ठाण्याबाहेरच एका नागरिकाला धमकी दिल्याची धक्कादायक घटना घडली. याप्रकरणी संबंधित नगरसेवकाविरोधात तक्रार दाखल करण्यात आली. सचिन रघुनाथ चाकणकर (वय ४६, रा. बाणेर) यांनी बाणेर पोलिस ठाण्यात तक्रार दिली आहे. त्यावरून हा अदखलपात्र गुन्हा दाखल करण्यात आला आहे.
प्रतिस्पर्धी टोळीतील एकाच्या खूनाचा डाव उधळला – सविस्तर बातमी
पोलिसांनी दिलेल्या माहितीनुसार, तक्रारदार यांच्या राहत्या जागेवरून चुलत भावांशी मालमत्तेचा वाद सुरू आहे. या वादग्रस्त जागेवर सुरू असलेल्या बांधकामाला महापालिकेने ‘स्टॉप वर्क’ नोटीस दिली होती. त्यानंतरही तेथे बांधकाम सुरूच असल्याने तक्रारदार या प्रकरणाची तक्रार करण्यासाठी कुटुंबियांसह पोलिस ठाण्यात गेले होते. दरम्यान, तेथे राष्ट्रवादी काँग्रेसचे बाबुराव चांदेरे आले.
त्यांनी चाकणकर यांच्याशी वाद घालत, ‘माझ्या कार्यकर्त्यांचे काम थांबवतोस का? तुझे घरही पाडून टाकतो, तू कसा जगतोस ते बघतो,’ अशी धमकी दिल्याचा आरोप तक्रारदाराने केला आहे. तसेच, नगरसेवकाने आपल्या चालकाला ‘बांबू काढ’ असे सांगत मारहाणीची धमकी दिल्याचेही तक्रारीत नमूद आहे. घटनेनंतर तक्रारदाराने पोलिसांकडे धाव घेतली असून, संबंधितांवर कायदेशीर कारवाई करण्याची मागणी केली आहे. पोलिसांनी तक्रार नोंदवून प्रकरणाची चौकशी सुरू केली आहे, अशी माहिती वरिष्ठ निरीक्षक चंद्रशेखर सावंत यांनी सांगितले.
