भोर तालुक्यातील दुर्घटना
marathinews24.com
पुणे – गावी निघालेल्या दुचाकीस्वार आजोबा आणि नऊ वर्षीय नातीचा भरधाव डंपरच्या धडकेत मृत्यू झाल्याची दुर्देवी घटना भोर तालुक्यात घडली. याप्रकरणी डंपर चालकाविरुद्ध भोर पोलिसांनी गुन्हा दाखल केला. शिवाजी नामदेव शिळीमकर (वय ६९), तन्वी नितीन शिळीमकर (वय ९, दोघे रा. तांभाड, ता. भोर, जि. पुणे ) अशी मृत्यमुखी पडलेल्यांची नावे आहेत. डंपर चालक आकाश शिवाजी भूषणे (रा. मांजरी, हडपसर) याच्याविरुद्ध गुन्हा दाखल करुन त्याला अटक करण्यात आली. पोलीस कर्मचारी सुधाकर शिळीमकर यांनी भोर पोलीस ठाण्यात फिर्याद दिली आहे.
प्रेमसंबधाला विरोध करुन तरुणाचा खून – सविस्तर बातमी
पोलिसांनी दिलेल्या माहितीनुसार, शिवाजी शिळीमकर आणि कुटुंबीय हे सध्या कात्रजमधील आंबेगाव परिसरात राहायला आहेत. शिळीमकर कुटुंबीय मूळचे भोर तालुक्यातील तांभाड गावचे रहिवासी आहेत. शनिवारी (१४ मार्च) दुचाकीस्वार शिवाजी शिळीमकर हे नात तन्वी हिला घेऊन गावी निघाले होते. तांभाड-नसरापूर मार्गावरील देऊळवाडी हातवे परिसरात भरधाव डंपरने दुचाकीला पाठीमागून धडक दिली. अपघातात दोघे जण गंभीर जखमी झाले. अपघाताची माहिती मिळताच नागरिकांनी घटनास्थळी धाव घेतली. दोघांना तातडीने खासगी रुग्णालयात उपचारांसाठी दाखल करण्यात आले. उपचारांपूर्वीच दोघांचा मृत्यू झाल्याचे डाॅक्टरांनी सांगितले. अपघातात दुचाकीस्वार आजोबा आणि नऊ वर्षीय नातीचा मृत्यू झाल्याची माहिती मिळताच तांभाड गावात शोककळा पसरली.
