पेट्रोल पंप व्यवहारासाठी दबाव
marathinews24.com
पुणे – पेट्रोल पंप व्यवहारासाठी दबाव आणण्यासाठी लष्कर भागातील पूना क्लबच्या संचालकांना धमकाविण्यात आल्याचा प्रकार उघडकीस आला. याप्रकरणी कोरेगाव पार्क पोलिसांकडून भारतीय जनता पक्षाचे प्रवक्ते, तसेच शहरातील पेट्रोल विक्रेता संघटनेचे पदाधिकारी अली दारुवाला यांच्यासह तिघांविरुद्ध गुन्हा दाखल करण्यात आला आहे.
मोक्का गुन्ह्यात पसार टोळीप्रमुखाला बेड्या – सविस्तर बातमी
याबाबत ४७ वर्षीय महिलेने कोरेगाव पार्क पोलीस ठाण्यात फिर्याद दिली आहे. तक्रारदार महिला या लष्कर भागातील प्रतिष्ठित पूना क्लबच्या संचालक आहेत. त्या शंकरशेठ रस्त्यावरील मीरा सोसायटीत राहायला आहेत.
पोलिसांनी दिलेल्या माहितीनुसार, तक्रारदार ३० जानेवारीला क्लबमधील जलतरण तलावाजवळील पार्किंगमधून मोटार घेऊन घरी निघाल्या हाेत्या. त्यावेळी दारूवाला हे दोन साथीदारांसह तेथे आले. त्यांनी महिलेच्या मोटारीजवळ मोटार लावली. गोल्व्हा नावाच्या एका व्यक्तीबरोबर झालेला पेट्रोल पंपाचा व्यवहार लवकरात लवकर पूर्ण करण्यासाठी धमकी दिल्याचे महिलेने फिर्यादीत म्हटले आहे. सुरुवातीला बंडगार्डन पोलीस ठाण्यात हा गुन्हा दाखल झाला होता. त्यानंतर तो कोरेगाव पार्क पोलीस ठाण्यात वर्ग करण्यात आला या प्रकरणाचा तपास सुरू असल्याची माहिती कोरेगाव पार्क पोलीस ठाण्याचे वरिष्ठ पोलीस निरीक्षक विजयकुमार डोके यांनी दिली. सहायक पोलीस निरीक्षक सोमनाथ हंडाळ तपास करत आहेत.
‘तक्रारदार महिलेशी माझा कोणताही वाद नाही. मी पेट्रोल डीलर्स असोसिएशनचा पदाधिकारी आहे. त्या अनुषंगाने मी त्यांना व्यवहार पूर्ण करा, असे सांगत होतो. त्या व्यवहारात मी मध्यस्थ होतो. त्यामुळे त्यांना सांगायला गेलो होतो. आमच्यातील वाद मिटला आहे’, असे दारुवाला यांनी स्पष्ट करुन महिलेने केलेल आरोप फेटाळून लावले.
