गुंगीचे औषध देऊन मैत्रिणीची फसवणूक; भारती विद्यापीठ पोलिसांकडून तरुणी अटकेत
Marathinews24.com
पुणे – मैत्रिणीला काॅफीतून गुंगीचे औषध देऊन कपाटातील दागिने चोरुन पसार झालेल्या तरुणीला भारती विद्यापीठ पोलिसांनी अटक केली. तरुणीकडून साडेपाच लाख रुपयांचे दागिने जप्त केले आहे. याप्रकरणी २५ वर्षीय तरुणीला अटक करण्यात आली आहे. आरोपीच्या तरुणीच्या मैत्रिणीने भारती विद्यापीठ पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी तरुणी आणि आरोपी मैत्रिणी असून ६ मार्च रोजी तरुणी मैत्रिणीच्या घरी आली होती. त्यावेळी तिने मैत्रिणीला काॅफी करुन दिली. तिच्या काॅफीत नकळत गुंगीचे ओैषध मिसळले. मैत्रीण बेशुद्ध पडल्याने तिने कपाटातील पाच लाख रुपयांचे सोन्याचे दागिने चोरुन ती पसार झाली. मैत्रिणीला शुद्ध आल्यानंतर तरुणी पसार झाल्याचे लक्षात आले. तेव्हा शयनगृहातील कपाट उघडून दागिने चोरल्याचे उघडकीस आले. त्यानंतर तिने आरोपी तरुणीला जाब विचारला. तेव्हा दागिने चोरल्याची कबुली देऊन तिने दागिने परत करते, असे तिला सांगितले.
आरोपी तरुणीने दागिने परत केले. तिच्याकडे दागिने परत करण्यासाठी पाठपुरावा करण्यात आला. अखेर मैत्रिणीने भारती विद्यापीठ पोलीस ठाण्यात तक्रार दिली. पसार झालेल्या मैत्रिणीला भारती विद्यापीठ पोलिसांनी पुणे स्टेशन परिसरातून ताब्यात घेतले. पोलीस उपायुक्त स्मार्तना पाटील, सहायक आयुक्त राहुल आवारे यांच्या मार्गदर्शनाखाली वरिष्ठ पोलीस निरीक्षक सावळाराम साळगावकर, पोलीस निरीक्षक राहुलकुमार खिलारे, सहायक निरीक्षक विश्वास भाबड, उपनिरीक्षक निलेश मोकाशी, प्रियंका मोकाशी यांनी ही कामगिरी केली.
