सायबर चोरट्यांविरुद्ध गुन्हा दाखल
marathinews24.com
पुणे – काळ्या पैसे व्यवहारात कारवाईची भीती दाखवून महिलेची सायबर चोरट्यांनी ४ लाख ८२ हजार रुपयांची फसवणूक केल्याचा प्रकार उघडकीस आला. याप्रकरणी सायबर चोरट्यांविरुद्ध गुन्हा दाखल करण्यात आला.
याबाबत ४८ वर्षीय महिलेने सायबर पोलीस ठाण्यात फिर्याद दिली आहे. महिलेने दिलेल्या फिर्यादीनुसार, सायबर चोरट्यांविरुद्ध गुन्हा दाखल करण्यात आला आहे.
मोबाइल चोरणाऱ्या अल्पवयीनाला पकडले; ४ मोबाइल जप्त – सविस्तर बातमी
तक्रारदार महिला कोंढवा भागात राहायला आहे. सायबर चोरट्यांनी महिलेच्या मोबाइल क्रमांकावर डिसेंबर महिन्यात संपर्क साधला होता. काळ्या पैसे व्यवहारात बँक खात्याचा वापर करण्यात आला आहे. या प्रकरणात पोलिसांकडून कारवाई करण्यात येणार असल्याची भीती दाखवून चोरट्यांनी महिलेला अटक टाळण्यासाटी तातडीने पैसे जमा करावे लागतील, असे सांगितले. महिलेने चोरट्यांच्या खात्यात पैसे जमा केले. फसवणूक झाल्याचे लक्षात आल्यानंतर महिलेने नुकतीच पोलिसांकडे तक्रार दिली. पोलीस निरीक्षक संगीता देवकाते तपास करत आहेत.
केंद्रीय तपास यंत्रणांकडून कारवाई करण्यात येणार असल्याची बतावणी करुन नागरिकांची फसवणूक करण्याचे प्रकार वाढले आहेत. ईडी, नार्कोटिक्स कंट्रोल ब्युरो, सीबीआय अशा तपास यंत्रणांकडून कारवाईची भीती दाखवून चोरट्यांनी आतापर्यंत कोट्यवधी रुपयांची फसवणूक केल्याचे उघडकीस आले आहे.
