दुचाकीस्वार चोरट्यांचा हैदोस सुरूच
marathinews24.com
पुणे – शहरातील विविध भागात दुचाकीस्वार चोरट्यांनी धुडगूस घातला असून, पादचारी महिलांना लक्ष्य करीत दागिने हिसकावले जात आहेत. त्यामुळे महिलांमध्ये प्रचंड भीतीचे वातावरण असून, चोरट्यांचा अटकाव करण्याची मागणी केली जात आहे. दरम्यान, मागील काही दिवसांपासून दुचाकीस्वार चोरटे दिवसाढवळ्याही महिलांना टारगेट करीत लुट करीत आहेत. त्यामुळे कामानिमित्त घराबाहेर पडणार्‍या महिलांच्या मनात भीतीचे वातावरण आहे.
गुंतवणुकीच्या आमिषाने तब्बल ९२ लाखांची केली फसवणूक – सविस्तर बातमी
रस्त्याने पायी चाललेल्या महिलेचा पाठलाग करून दुचाकीस्वार चोरट्यांनी त्यांच्या गळ्यातील पावणेतीन लाख रुपयांचे मंगळसूत्र हिसकावून नेल्याची घटना खराडी भागात घडली. याबाबत महिलेने खराडी पोलीस ठाण्यात फिर्याद दिली आहे. तक्रारदार ५६ वर्षीय महिला चंदननगर भागात राहायला आहेत. शनिवारी (दि. २४) रात्री जेवण करुन रात्री सव्वादहाच्या सुमारास फेरफटका मारण्यासाठी बाहेर पडल्या होत्या. त्यावेळी खराडी रस्त्यावरील साईकृष्णा हॉटेलसमोर दुचाकीस्वार चोरट्यांनी त्यांच्या गळ्यातील मंगळसूत्र हिसकावून नेले. सीसीटीव्ही फुटेजच्या माध्यमातून पसार झालेल्या चोरट्याचा माग काढण्यात येत असून, पोलिसांनी खराडी रस्त्यावरील सीसीटीव्ही चित्रीकरण तपासले आहे. पोलीस उपनिरीक्षक प्रणिल चौगले तपास करत आहेत.
विमाननगरमध्ये भरदिवसा महिलेचे दागिने हिसकावले
रिक्षाची वाट पाहत थांबलेल्या महिलेच्या गळ्यातील अडीच लाख रुपयांचे मंगळसूत्र हिसकावून नेल्याची घटना रविवारी (दि.२५) विमाननगर भागात घडली. याप्रकरणी ५२ वर्षीय महिलेने विमानतळ पोलीस ठाण्यात फिर्याद दिली आहे. त्यानुसार दुचाकीस्वार चोरट्यांविरुद्ध गुन्हा दाखल केला आहे. तक्रारदार महिला विमाननगर भागात राहायला असून, रविवारी दुपारी सव्वाबाराच्या सुमारास लुंकड क्लासिक सोसायटीसमोर रिक्षाची वाट पाहत थांबल्या होत्या. त्यावेळी दुचाकीस्वार चोरट्यांनी महिलेच्या गळ्यातील २ लाख ४५ हजारांचे मंगळसूत्र हिसकावून नेले. महिलेने आरडाओरड करेपर्यंत दुचाकीस्वार चोरटे सुसाट पसार झाले. याप्रकरणी सहायक पोलीस निरीक्षक विजय चंदन तपास करत आहेत.
