वाघोलीतील ४५ वर्षीय व्यक्तीची सायबर फसवणूक
marathinews24.com
पुणे – खासगी आयुर्विमा पाॅलिसीची रक्कम परत मिळवून देण्याच्या आमिषाने सायबर चोरट्याने एकाची ४० लाख रुपयांची फसवणूक केल्याचा प्रकार उघडकीस आला. याप्रकरणी सायबर चोरट्याविरुद्ध पोलिसांनी गुन्हा दाखल केला. याबाबत एकाने वाघोली पोलीस ठाण्यात फिर्याद दिली आहे.
पीएमपीएल बसमधून पडली, शालेय बसखाली सापडून महाविद्यालयीन तरूणी ठार – सविस्तर बातमी
पोलिसांनी दिलेल्या माहितीनुसार, ४५ वर्षीय तक्रारदार हे वाघोलीत राहायला आहेत. त्यांनी एका खासगी कंपनीच्या आयुर्विमा पाॅलिसीत रक्कम गुंतविली होती. सायबर चोरट्याने त्यांच्याशी संपर्क साधला. आयुर्विमा पाॅलिसीची मुदत संपली असून, विमा कंपनीकडून तुम्हाला रक्कम परत करण्यात येणार आहे, अशी बतावणी चोरट्याने त्यांच्याकडे केली. त्यानंतर चोरट्याने नाहरकत प्रमाणपत्र, अन्य करांच्या नावाखाली त्यांच्याकडून वेळोवेळी पैसे घेतले. चोरट्याच्या बँक खात्यात त्यांनी ४० लाख रुपये जमा केले. पैसे जमा केल्यानंतर त्यांना पाॅलिसीत गुंतवलेली रक्कम परत मिळाली नाही. त्यानंतर त्यांनी चौकशी केली. चौकशीत फसवणुकीचा प्रकार उघडकीस आला. गुन्हे शाखेच्या पोलीस निरीक्षक पल्लवी मेहेर तपास करत आहेत.
पाॅलिसी सुरू करून देण्याच्या आमिषाने ११ लाखांची फसवणूक
बंद पडलेली विमा पाॅलिसी सुरू करून देण्याची बतावणी करुन सायबर चोरट्याने हडपरसमधील एका तरुणाची अकरा लाख रुपयांची फसवणूक केली. या प्रकरणी सायबर चोरट्याविरुद्ध काळेपडळ पोलीस ठाण्यात गुन्हा दाखल करण्यात आला आहे. याबाबत एका तरुणाने फिर्याद दिली आहे.
सायबर चोरट्याने तक्रारदार तरुणाच्या मोबाइल क्रमांकावर संपर्क साधला. बंद पडलेली विमा पाॅलिसी सुरू देतो. पाॅलिसी सुरू झाल्यानंतर २५ लाख ९२ हजार रुपये परत मिळवून देतो, असे आमिष दाखवून तक्रारदाराला जाळ्यात ओढले. त्यानंतर चोरट्याने तक्रारदार तरुणाने चोरट्याच्या बँक खात्यात वेळोवेळी दहा लाख ८६ हजार रुपये जमा केले. गुन्हे शाखेचे पोलीस निरीक्षक अण्णासाहेब बाबर तपास करत आहेत.
