सर्व उपाययोजना एकत्रितपणे अवलंबिल्यास हुमणी किडीवर नियंत्रण मिळविणे शक्य
marathinews24.com
बारामती – ऊस पिकामधील हुमणी किडीवर प्रभावी नियंत्रण मिळविण्यासाठी एकात्मिक हुमणी कीड व्यवस्थापनाच्यादृष्टीने उपाययोजना करण्याचे कृषी विभागाच्यावतीने आवाहन करण्यात येत आहे.
हुमणी किडीच्या नियंत्रणासाठी प्रतिबंधात्मक, यांत्रिक, जैविक व रासायनिक या सर्व उपाययोजनांचा एकत्रितपणे वापर करणे आवश्यक आहे. कीटकांच्या जीवनचक्राचा अभ्यास करून योग्य वेळी उपाययोजना केल्यास किडीवर प्रभावी नियंत्रण मिळवता येईल.
प्रतिबंधात्मक उपाय
पिकांची निवड : हुमणीचा प्रादुर्भाव कमी असलेल्या पिकांची निवड करणे.
पिकांची फेरपालट : हुमणीचा प्रादुर्भाव होणाऱ्या पिकांसोबत ज्वारी, ऊस यांसारख्या पिकांच्या ऐवजी इतर पिके घेण्याचा पर्यायाचा विचार करावा.
साफसफाई : शेतातील अनावश्यक गवत काढून टाकणे, जेणेकरून हुमणीच्या भुंगेऱ्यांसाठी अधिवास मिळणार नाही.
यांत्रिक उपाययोजना
प्रकाश सापळे : वळवाचा पहिला पाऊस पडल्यानंतर रात्रीच्या वेळी प्रकाश सापळ्यांचा वापर करून भुंगेरे आकर्षित करून त्यांना पकडणे.
जैविक नियंत्रण :
प्रतिजैविक बुरशी : बी. व्हेरिआना सारख्या बुरशीची फवारणी करणे. ही बुरशी हुमणीच्या अळीच्या संपर्कात येताच तिला नष्ट करते.
नियंत्रित प्राण्यांचा वापर : पक्षी हुमणीच्या आळ्यांना खातात, त्यामुळे शेतामध्ये पक्ष्यांसाठी अनुकूल वातावरण निर्माण करणे.
रासायनिक उपाययोजना
प्रमाणित कीटकनाशके : पीक लागवडीपूर्वी किंवा वाढीच्या अवस्थेत तज्ञांच्या सल्ल्यानुसार प्रमाणित कीटकनाशकांचा वापर करणे.
फवारणी : हुमणीच्या प्रौढ भुंगेऱ्यांचा उपद्रव वाढल्यास, कृषी तज्ञांच्या सल्ल्याने योग्य कीटकनाशकांची फवारणी करणे. अशा एकूणच सर्व उपाययोजनांचा वापर करून हुमणी किडीवर नियंत्रण मिळवता येऊ शकते
या सर्व उपाययोजना एकत्रितपणे अवलंबिल्यास हुमणी किडीवर नियंत्रण मिळविणे शक्य होते तसेच पर्यावरणीय समतोलही राखला जातो,असे तालुका कृषी अधिकारी सचिन हाके यांनी प्रसिद्धी पत्रकांनव्ये कळविले आहे.
